Канон Пресвятой Богородице пред иконой «Иверская»

Пѣ́снь а҃.

І҆рмо́съ:

Колесницегони́телѧ фараѡ́нѧ погрꙋзѝ чꙋдотворѧ́й и҆ногда̀ мѡѷсе́йскїй же́злъ, крестоѡбра́знѡ порази́въ и҆ раздѣли́въ мо́ре: і҆и҃лѧ же бѣглеца̀ пѣшехо́дца сп҃сѐ, пѣ́снь бг҃ови воспѣва́юща.

Ѿ скве́рныхъ ᲂу҆сте́нъ хвале́нїе прїимѝ, всенепоро́чнаѧ, ꙗ҆́коже пре́жде сн҃ъ тво́й, бг҃ъ же мо́й и҆ гдⷭ҇ь, прїѧ́тъ двѣ̀ лє́пты вдови́цы, и҆ разрѣше́нїе прегрѣше́нїй мои́хъ пода́ждь, ꙗ҆́кѡ да по до́лгꙋ велича́ю тѧ̀.

А҆́гг҃льское пѣ́нїе подоба́ше тебѣ̀ мт҃ри бж҃їей, творца́ бо си́хъ родила̀ є҆сѝ стра́ннѡ. но и҆ ѿ на́съ прїимѝ, влⷣчце, смирє́нныѧ сїѧ̑ моли̑твы, да пое́мъ гдⷭ҇еви: сла́внѡ просла́висѧ въ на́шей не́мощи.

Ѡ҆гꙋстѣ́ша во́ды, ѡ҆гꙋстѣ́ша и҆ во́лны посредѣ̀ мо́рѧ, носѧ́ща твою̀, бг҃ома́ти, і҆кѡ́нꙋ. ᲂу҆твердѝ и҆ моѐ подви́гшеесѧ се́рдце на ка́мени за́повѣдей хрⷭ҇то́выхъ.

Помо́щница и҆ покрови́тельница была̀ є҆сѝ, дв҃о, ѻ҆би́тели і҆́верскїѧ, во́євъ а҆ми́ры съ корабли̑ и҆́хъ въ мо́ри погрꙋзи́вши: но потопѝ въ пꙋчи́нѣ милосе́рдїѧ сн҃а твоегѡ̀ всѧ̑ моѧ̑ дꙋшє́вныѧ стра̑сти и҆ безчи́слєннаѧ моѧ̑ прегрѣшє́нїѧ.

Пѣ́снь г҃.

І҆рмо́съ:

Оу҆твержде́й въ нача́лѣ нб҃са̀ ра́зꙋмомъ и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Оу҆твердѝ се́рдце моѐ во ᲂу҆пова́нїи на тѧ̀, бг҃ома́ти, и҆з̾мѝ всѧ́кꙋю горды́ню и҆ превозноше́нїе и҆з̾ помраче́ннагѡ ᲂу҆ма̀ моегѡ̀, да вопїю̀: нѣ́сть свѧ́тъ, ꙗ҆́кѡ гдⷭ҇ь, и҆ нѣ́сть пра́веденъ, ꙗ҆́кѡ бг҃ъ на́шъ.

Ты̀, ѽ бг҃ома́ти, немощствꙋ́ющыѧ препоѧсꙋ́еши си́лою, а҆́лчꙋщыѧ насыща́еши: посѣтѝ и҆ мою̀ не́мощь, и҆ а҆́лчꙋщаго и҆ жа́ждꙋщаго менѐ насы́ти живо́тнагѡ хлѣ́ба, чрез̾ твою̀ дѣ́вственнꙋю ᲂу҆тро́бꙋ сше́дшагѡ съ нб҃сѐ на зе́млю.

Возста́ви, влⷣчце, ѿ землѝ менѐ ᲂу҆бо́гаго, и҆ ѿ гно́ища грѣхо́внагѡ воздви́гни ни́щаго: да́ждь моли́твꙋ мнѣ̀ молѧ́щемꙋсѧ, да велича́ѧ пою̀ твоѐ застꙋпле́нїе.

Непло́дствꙋющїй мо́й ᲂу҆́мъ плодоно́сенъ покажѝ, бл҃га́ѧ дв҃о, ѿ непло́дове ро́ждшаѧсѧ: ты́ бо плодоно́сїе всѣ́хъ бла́гъ ꙗ҆вле́нїемъ і҆кѡ́ны твоеѧ̀ подае́ши.

Сѣда́ленъ:

Свѣ́тлое дне́сь застꙋ́пницы на́шеѧ наста̀ торжество̀: да взыгра́етсѧ тва́рь, да ликовствꙋ́ютъ человѣ́честїи собо́ри: созыва́етъ бо на́съ ст҃а́ѧ бцⷣа ви́дѣти ѻ҆гнено́снꙋю і҆кѡ́нꙋ свою̀, лꙋча́ми млⷭ҇ти вѣ̑рныѧ просвѣща́ющꙋю. тѣ́мже ра́дꙋющесѧ вопїе́мъ: сп҃сѝ, гпⷭ҇жѐ, ѿ гла́да, ѻ҆гнѧ̀, меча̀ и҆ бѣ́дъ всѧ̑ почита́ющыѧ ꙗ҆вле́нїе і҆кѡ́ны твоеѧ̀.

Пѣ́снь д҃.

І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Покры̀ нб҃са̀ добродѣ́тель твоѧ̀, бг҃ома́ти, и҆ хвалы̀ твоеѧ̀ и҆спо́лнисѧ землѧ̀: но положѝ любо́вь держа́внꙋю крѣ́пости твоеѧ̀ и҆ на мнѣ̀ ѿча́ѧнномъ.

Оу҆готовлѧ́ющи ше́ствїе чꙋ́днѣй і҆кѡ́нѣ твое́й, дадѐ бе́здна гла́съ сво́й, воздви́жесѧ со́лнце, и҆ сїѧ́нїе є҆ѧ̀ ꙗ҆́кѡ свѣ́тъ бы́сть: но ты̀ и҆зшла̀ є҆сѝ на сп҃се́нїе люде́й, сп҃стѝ твоѐ наслѣ́дїе пришла̀ є҆сѝ.

Оу҆слы́шавше слꙋ́хъ прише́ствїѧ твоегѡ̀, и҆́ноцы ᲂу҆боѧ́шасѧ, ᲂу҆разꙋмѣ́вше же дѣла̀ твоѧ̑ ᲂу҆жасо́шасѧ. но внегда̀ смꙋти́тисѧ дꙋшѝ мое́й, млⷭ҇ть твою̀ помѧнѝ, влⷣчце, да взыва́ю: сла́ва застꙋпле́нїю твоемꙋ̀, бг҃ома́ти.

Ты̀ є҆сѝ моѧ̀ крѣ́пость и҆ си́ла, бцⷣе, тобо́ю почі́ю въ де́нь ско́рби моеѧ̀, и҆ и҆з̾ страны̀ прише́льствїѧ взы́дꙋ тобо́ю въ нбⷭ҇ное наслѣ́дїе, и҆ возра́дꙋюсѧ ѡ҆ гдⷭ҇ѣ и҆ бз҃ѣ сп҃сѣ мое́мъ.

Пѣ́снь є҃.

І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

Ви́ждь, чⷭ҇таѧ, ѿ но́щи ᲂу҆́тренюющыѧ лю́ди па́ствы твоеѧ̀, і҆кѡ́нꙋ твою̀ бг҃охва́льнꙋю ѡ҆бстоѧ́щыѧ, разрѣше́нїѧ же грѣхѡ́въ просѧ́щыѧ, и҆ житїѧ̀ и҆справле́нїѧ, и҆ бж҃е́ственныѧ сла́вы прича́стїѧ: не ѿри́ни ᲂу҆̀бо на́съ ѿ лица̀ твоегѡ̀, свѣ́та незаходи́магѡ мт҃и.

Все́ю дꙋше́ю и҆ мы́слїю въ па́ствѣ твое́й всѝ сликꙋ́юще, ѱалмы̑ и҆ пѣ́сньми дх҃о́вными и҆ пѣ́нїемъ бж҃е́ственнымъ і҆кѡ́нꙋ твою̀ почита́ютъ, проще́нїѧ грѣхѡ́въ просѧ́ще и҆ дꙋ́шъ сп҃се́нїѧ. ты́ же и҆сцѣле́нїе на́ше сꙋ́щи, сїѧ̑ всѧ̑ пода́ждь, влⷣчце бг҃оневѣ́сто.

Хра́мъ тво́й, дв҃о, ꙗ҆́кѡ ра́й дрꙋгі́й показа́сѧ ны́нѣ, ꙗ҆́кѡ дре́во жи́зни и҆мѣ́ѧ і҆кѡ́нꙋ красоты̀ твоеѧ̀, ю҆́же всѝ ᲂу҆се́рднѡ со бл҃гоговѣ́нїемъ и҆ любо́вїю цѣлꙋ́юще, взыва́емъ: влⷣчце, ми́ръ да́ждь на́мъ, влⷣчце, стѧжѝ на́съ, и҆но́гѡ бо ра́звѣ тебє̀ ᲂу҆тѣше́нїѧ не вѣ́мы.

Рѣкꙋ́ тѧ сла́дкꙋю и҆ пото́къ насыще́нїѧ, ма́ннꙋ небе́снꙋю, и҆з̾ѻби́лїе и҆ бл҃года́ть приснотекꙋ́щꙋю во ѻ҆би́тели твое́й живꙋ́щїи стѧжа́вше, пою́тъ ржⷭ҇тво̀ твоѐ, ѻ҆трокови́це.

Пѣ́снь ѕ҃.

І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.

Въ ско́рби се́рдца вопїю́ ти, влⷣчце, жите́йскагѡ мо́рѧ потоплѧ́емь бꙋ́рею, къ тебѣ̀ ꙗ҆́кѡ ти́хомꙋ приста́нищꙋ прибѣга́ю: возведѝ ѿ тлѝ живо́тъ мо́й.

Бе́здна послѣ́днѧѧ грѣхѡ́въ ѡ҆бы́де мѧ̀, и҆ и҆счеза́етъ дꙋ́хъ мо́й: но прострѝ, влⷣчце, высо́кꙋю твою̀ мы́шцꙋ, и҆ ꙗ҆́кѡ гаврїи́ла, и҆ менѐ ко твое́й і҆кѡ́нѣ прибѣга́юща невреди́ма сотворѝ.

Не ѿри́ни менѐ до конца̀ ѿ лица̀ твоегѡ̀, мт҃и незаходи́магѡ свѣ́та, не попꙋстѝ мнѣ̀ погрѧ́знꙋти въ пꙋчи́нѣ беззако́нїй: но возведѝ менѐ ѿ бла́та страсте́й, да взы́детъ и҆з̾ и҆стлѣ́нїѧ живо́тъ мо́й, и҆ пожрꙋ̀ тебѣ̀ со гла́сомъ хвале́нїѧ и҆ и҆сповѣ́данїѧ.

Хра́мъ носѧ́й тѣле́сный ве́сь ѡ҆скверне́нъ, тебѣ̀, пречи́стомꙋ хра́мꙋ вѣ́чнагѡ сло́ва, дерза́ю въ честнѣ́мъ хра́мѣ твое́мъ, пред̾ твое́ю ст҃о́ю і҆кѡ́ною, приноси́ти смирє́нныѧ моѧ̑ моли̑твы. ты́ же, ꙗ҆́кѡ млⷭ҇тиваѧ, ѡ҆чи́сти мѧ̀ твои́мъ бл҃гоꙋтро́бїемъ.

Конда́къ, гла́съ и҃:

А҆́ще и҆ въ мо́ре вве́ржена бы́сть ст҃а́ѧ і҆кѡ́на твоѧ̀, бцⷣе, ѿ вдови́цы, не могꙋ́щїѧ спастѝ сїю̀ ѿ врагѡ́въ: но ꙗ҆ви́ласѧ є҆́сть храни́тельница а҆ѳѡ́на и҆ врата́рница ѻ҆би́тели і҆́верскїѧ, врагѝ ᲂу҆страша́ющаѧ и҆ въ правосла́внѣй рѡссі́йстѣй странѣ̀ чтꙋ́щыѧ тѧ̀ ѿ всѣ́хъ бѣ́дъ и҆ напа́стей и҆збавлѧ́ющаѧ.

І҆́косъ:

Въ столпѣ̀ ѻ҆́гненнѣ ꙗ҆́вльшꙋюсѧ бг҃ома́тере і҆кѡ́нꙋ ви́дѣвше, возопи́ша по́стникѡвъ і҆́верскихъ ли́цы: ѽ влⷣко, сподо́би на́съ прїѧ́ти і҆кѡ́нꙋ мт҃ре твоеѧ̀, во ᲂу҆тѣше́нїе стра́нствїѧ на́шегѡ: ты́ же, гаврїи́ле, дерза́й и҆ вни́ди въ мо́ре, и҆ прїимѝ во ѡ҆б̾ѧ̑тїѧ твоѧ̑ сокро́вище на́мъ ꙗ҆влѧ́емое, да бꙋ́детъ на́мъ стра́жъ неꙋсы́пный, покро́въ же и҆ ра́дость всѣ̑мъ хрⷭ҇тїа́нѡмъ, и҆ храни́тельница, ѿ бѣ́дъ и҆ напа́стей и҆збавлѧ́ющаѧ.

Пѣ́снь з҃.

І҆рмо́съ:

Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ, ра́дованною ного́ю ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Согрѣши́хомъ, беззако́нновахомъ, непра́вдовахомъ пред̾ гдⷭ҇емъ: но, влⷣчце моѧ̀ бцⷣе, ꙗ҆́кѡ бл҃га́ѧ, ᲂу҆гасѝ ѻ҆́гнь є҆гѡ̀ пра́веднагѡ гнѣ́ва твои́мъ те́плымъ хода́тайствомъ, да пое́мъ є҆мꙋ̀: ѻ҆тє́цъ на́шихъ бж҃е, бл҃гослове́нъ є҆сѝ.

Въ пещѝ и҆скꙋше́нїй и҆ бѣ́дъ ѡ҆палѧ́ємыѧ ѡ҆росѝ, бг҃ома́ти, стрꙋѧ́ми твои́хъ щедро́тъ, да посрамѧ́тсѧ вразѝ на́ши, и҆ да разꙋмѣ́ютъ всѝ, ꙗ҆́кѡ ты̀ є҆ди́на є҆сѝ влⷣчца бцⷣа, по все́й вселе́ннѣй сла́вимаѧ.

Прⷭ҇то́ле цр҃ѧ̀ сла́вы, честнѣ́йшаѧ херꙋві̑мъ, ѡ҆дꙋшевле́нный хра́ме, въ не́мже всели́сѧ гдⷭ҇ь, тве́рдь нбⷭ҇наѧ, на не́йже возсїѧ̀ сл҃нце пра́вды хрⷭ҇то́съ, тѧ̀ пое́мъ, бг҃ома́ти, и҆ превозно́симъ во всѧ̑ вѣ́ки.

Ты̀ є҆сѝ весе́лїе и҆ въ пꙋсты́нехъ живꙋ́щымъ, ты̀ є҆сѝ и҆ сто́льнагѡ гра́да ᲂу҆тѣше́нїе и҆ похвала̀, дв҃о мр҃і́е, препѣ́таѧ и҆ превозноси́маѧ во вѣ́ки.

Пѣ́снь и҃.

І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею сп҃сє́ны сїѧ̀ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те, сщ҃е́нницы воспо́йте, лю́дїе превозноси́те во всѧ̑ вѣ́ки.

Пою́тъ тѧ̀ а҆́гг҃льскїѧ си̑лы, превозно́ситъ человѣ́ческїй ро́дъ, бл҃гослови́тъ тѧ̀ всѧ̀ тва́рь, пречⷭ҇таѧ дв҃о бцⷣе: прїимѝ и҆ ѿ менє̀ недосто́йнагѡ приноси́мое тебѣ̀ хвале́нїе.

По́йте и҆́ноцы а҆ѳѡ́на, бл҃гословлѧ́й землѐ і҆́верскаѧ, превозносѝ всѧ̀ страно̀ рѡссі́йскаѧ бл҃гꙋ́ю влⷣчцꙋ, рѣ́ки чꙋде́съ ѿ своеѧ̀ чꙋдотво́рныѧ і҆кѡ́ны и҆сточа́ющꙋю. хва́лимъ, бл҃гослови́мъ, покланѧ́емсѧ тѝ, бцⷣе, пою́ще и҆ превозносѧ́ще во всѧ̑ вѣ́ки.

Подо́бїемъ і҆кѡ́ны і҆́верскїѧ не то́чїю ст҃ы́й а҆ѳѡ́нъ просвѣща́етсѧ, но и҆ сто́льный гра́дъ москва̀ ᲂу҆краша́етсѧ, ѿ тогѡ̀ чꙋде́снꙋю по́мощь прїе́млѧ и҆ и҆сто́чникъ ᲂу҆тѣше́нїѧ въ не́мъ ѡ҆брѣта́ѧ.

Є҆щѐ и҆ страна̀ новгоро́дскаѧ и҆ и҆ні́и гра́ды и҆ вє́си подо́бїемъ і҆́верскїѧ і҆кѡ́ны твоеѧ̀, влⷣчце, ѡ҆ст҃и́шасѧ, и҆ чꙋдесы̀ просвѣти́шасѧ, вопїю́ще: гдⷭ҇а по́йте и҆ превозноси́те во всѧ̑ вѣ́ки.

Пѣ́снь ѳ҃.

І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ. тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.

Та́йна глꙋбины̀ ржⷭ҇тва̀ твоегѡ̀ ᲂу҆́мъ а҆́гг҃льскїй ᲂу҆жаса́етъ, дв҃о, и҆ пречи́стаѧ і҆кѡ́на твоѧ̀ де́моны прогонѧ́етъ: не терпѧ́ще бо взира́ти на си́лꙋ є҆ѧ̀, бѣ́гаютъ и҆ и҆счеза́ютъ. мы́ же то́й любе́знѡ покланѧ́емсѧ и҆ ѡ҆блобыза́емъ, и҆ тѧ̀ бцⷣꙋ велича́емъ.

Прїиди́те всѝ, поклони́мсѧ, припаде́мъ и҆ возвели́чимъ бж҃їю мт҃рь, призрѣ́вшꙋю на на́съ смире́нныхъ, а҆́лчꙋщыѧ и҆сполнѧ́ющꙋю бла́гъ, и҆ положи́вшꙋю съ на́ми завѣ́тъ млⷭ҇ти во ꙗ҆вле́нїи своеѧ̀ ди́вныѧ і҆кѡ́ны.

Бцⷣе дв҃о, ᲂу҆пова́нїе хрⷭ҇тїа́нѡмъ, проба́ви и҆ на́шемꙋ ро́дꙋ млⷭ҇ти твоѧ̑, бы́вшыѧ ѻ҆тцє́мъ на́шымъ, покры́й и҆ соблюдѝ на́съ ѿ всѧ́кагѡ ѕла̀.

Ѽ всемлⷭ҇тиваѧ хрⷭ҇тїа́нѡмъ помо́щнице, не мо́жетъ тѧ̀ воспѣ́ти досто́йнѡ ѧ҆зы́къ человѣ́ческїй и҆ а҆́гг҃льскїй, ꙗ҆́кѡ всеѧ̀ тва́ри честнѣ́йшꙋю и҆ земны́хъ сла́внѣйшꙋю: но прїимѝ ми́лостивнѡ сїѐ приноси́мое тебѣ̀ ѿ на́съ моле́нїе, и҆ сп҃са́й на́съ всегда̀, на тѧ́ бо ᲂу҆пова́ше возложи́хомъ.

Свѣти́ленъ:

І҆кѡ́нꙋ твою̀ всечестнꙋ́ю прїи́мъ гаврїи́лъ во ѡ҆б̾ѧ̑тїѧ, вопїѧ́ше тебѣ̀ влⷣчцѣ: ѽ сла́дкаѧ мт҃и цр҃ѧ̀ хрⷭ҇та̀, бꙋ́ди покро́въ твое́й ѻ҆би́тели, ра́дость же всѣ̑мъ хрⷭ҇тїа́нѡмъ, и҆ спорꙋ́чница жи́зни вѣ́чныѧ.

«Расстрелян в своём имении…»

КАНОН ПРЕСВЯТЕЙ БОГОРОДИЦЕ ПРЕД ЕЯ ИКОНОЙ ИВЕРСКАЯ

Тропарь, глас 1-й

Дерзость ненавидящих образ Господень и держава нечестивых безбожно в Никею прииде, и посланнии безчеловечно вдовицу, благочестно чтущую икону Богоматери, истязуют, но тая нощию с сыном икону в море пусти, вопиющи: слава Тебе, Чистая, яко непроходимое море плещи своя подаде, слава правошествию Твоему, Едина Нетленная.

КАНОН, глас 8-й

Песнь 1

Ирмос: Колесницегонителя фараоня погрузи, чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.

Припев: Пресвятая Богородице, спаси нас.

От скверных устен хваление приими, Всенепорочная, якоже прежде Сын Твой, Бог же мой и Господь, прият две лепты вдовицы, и разрешение прегрешений моих подаждь, яко да по долгу величаю Тя.

Пресвятая Богородице, спаси нас.

Ангельское пение подобаше Тебе, Матери Божией, Творца бо сих родила еси странно. Но и от нас приими, Владычице, смиренныя сия молитвы, да поем Господеви: славно прославися в нашей немощи.

Слава: Огустеша воды, огустеша и волны посреде моря, носящя Твою, Богомати, икону. Утверди и мое подвигшееся сердце на камени заповедей Христовых.

И ныне: Помощница и Покровительница была еси, Дево, обители Иверския, воев Амиры с корабли их в мори погрузивши, но потопи в пучине милосердия Сына Твоего вся моя душевныя страсти и безчисленная моя прегрешения.

Песнь 3

Ирмос: Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Пресвятая Богородице, спаси нас.

Утверди сердце мое во уповании на Тя, Богомати, изми всякую гордыню и превозношение из помраченнаго ума моего, да вопию: несть свят, яко Господь, и несть праведен, яко Бог наш.

Пресвятая Богородице, спаси нас.

Ты, о Богомати, немощствующия препоясуеши силою, алчущия насыщаеши; посети и мою немощь и алчущаго и жаждущаго мене насыти Животнаго Хлеба, чрез Твою девственную утробу сшедшаго с Небесе на землю.

Слава: Возстави, Владычице, от земли мене, убогаго, и от гноища греховнаго воздвигни, нищаго, даждь молитву мне, молящемуся да, величая, пою Твое заступление.

И ныне: Неплодствующий мой ум плодоносен покажи, Благая Дево, от неплодове рождшаяся: Ты бо плодоносие всех благ явлением иконы Твоея подаеши.

Господи, помилуй (трижды). Слава, и ныне:

Седален

Светлое днесь Заступницы нашея наста торжество. Да взыграется тварь, да ликовствуют человечестии собори, созывает бо нас Святая Богородица видети огненосную икону Свою лучами милости верныя просвещающую. Темже, радующеся, вопием: спаси, Госпоже, от глада, огня, меча и бед вся почитающия явление иконы Твоея.

Песнь 4

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.

Пресвятая Богородице, спаси нас.

Покры Небеса добродетель Твоя, Богомати, и хвалы Твоея исполнися земля, но положи любовь державную крепости Твоея и на мне, отчаянном.

Пресвятая Богородице, спаси нас.

Уготовляющи шествие, чудней иконе Твоей, даде бездна глас свой, воздвижеся солнце, и сияние ея яко свет бысть, но Ты изшла еси на спасение людей, спасти Твое наследие пришла еси.

Слава: Услышавше слух пришествия Твоего, иноцы убояшася; уразумевше же дела Твоя, ужасошася, но внегда смутитися души моей, милость Твою помяни, Владычице, да взываю: слава заступлению Твоему, Богомати.

И ныне: Ты еси моя крепость и сила, Богородице, Тобою почию в день скорби моея, и из страны пришельствия взыду Тобою в Небесное наследие, и возрадуюся о Господе и Бозе, Спасе моем.

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Пресвятая Богородице, спаси нас.

Виждь, Чистая, от нощи утренюющия люди паствы Твоея, икону Твою Богохвальную обстоящия, разрешения же грехов просящия, и жития исправления, и Божественныя славы причастия: не отрини убо нас от лица Твоего, Света Незаходимаго Мати.

Пресвятая Богородице, спаси нас.

Всею душею и мыслию в пастве Твоея вси сликующе, псалмы, и песньми духовными, и пением Божественным икону Твою почитают, прощения грехов просяще и душ спасения. Ты же, исцеление наше сущи, сия вся подаждь, Владычице Богоневесто.

Слава: Храм Твой, Дево, яко рай другий показася ныне, яко древо жизни имея икону красоты Твоея, юже вси усердно со благоговением и любовию целующе, взываем: Владычице, мир даждь нам, Владычице, стяжи нас, иного бо разве Тебе утешения не вемы.

И ныне: Реку Тя сладкую и поток насыщения, манну Небесную, изобилие и благодать приснотекущую во обители Твоей живущии стяжавше, поют Рождество Твое, Отроковице.

Песнь 6

Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего

Пресвятая Богородице, спаси нас.

В скорби сердца вопию ти, Владычице, житейскаго моря потопляем бурею, к Тебе, яко тихому пристанищу, прибегаю: возведи от тли живот мой.

Пресвятая Богородице, спаси нас.

Бездна последняя грехов обыде мя, и исчезает дух мой, но простри, Владычице, высокую Твою мышцу и, яко Гавриила, и мене, ко Твоей иконе прибегающа, невредима сотвори.

Слава: Не отрини мене до конца от лица Твоего, Мати Незаходимаго Света, не попусти мне погрязнути в пучине беззаконий, но возведи мене от блата страстей, да взыдет из истления живот мой и пожру Тебе со гласом хваления и исповедания.

Иныне:Храм носяй телесный весь осквернен, Тебе, Пречистому храму Вечнаго Слова, дерзаю в честнем храме Твоем, пред Твоею святою иконою приносити смиренныя моя молитвы. Ты же, яко Милостивая, очисти мя Твоим благоутробием.

Господи, помилуй (трижды). Слава, и ныне:

Кондак, глас 8-й

Аще и в море ввержена бысть святая икона Твоя, Богородице, от вдовицы, не могущия спасти сию от врагов, но явилася есть хранительница Афона и вратарница обители Иверския, враги устрашающая и в православней Российстей стране чтущия Тя от всех бед и напастей избавляющая.

Икос

В столпе огненне явльшуюся Богоматере икону видевше, возопиша постников иверских лицы: о Владыко, сподоби нас прияти икону Матере Твоея во утешение странствия нашего; ты же, Гаврииле, дерзая и вниди в море, и приими во объятия твоя сокровише, нам являемое, да будет нам страж неусыпный, покров же, и радость всем христианом, и хранительница, от бед и напастей избавляющая.

Песнь 7

Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице ликующе, пояху: благословен еси, Боже отец наших.

Пресвятая Богородице, спаси нас.

Согрешихом, беззаконновахом, неправдовахом пред Господем, но, Владычице моя Богородице, яко Благая угаси огнь Его праведнаго гнева Твоим теплым ходатайством, да поем Ему: отец наших Боже, благословен еси.

Пресвятая Богородице, спаси нас.

В пещи искушений и бед опаляемыя ороси, Богомати, струями Твоих щедрот, да посрамится врази наши и да разумеют вси, яко Ты едина еси Владычица Богородица, по всей вселенней славимая.

Слава: Престоле Царя Славы, Честнейшая Херувим, одушевленный храме, в немже вселися Господь, твердь Небесная, на нейже возсия Солнце Правды, Христос, Тя поем, Богомати, и превозносим во вся веки.

И ныне: Ты еси веселие и в пустынях живущим, Ты еси и стольнаго града утешение и похвала, Дево Марие, препетая и превозносимая во веки.

Песнь 8

Ирмос: Седмерицею пещь халдейский мучитель Богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.

Пресвятая Богородице, спаси нас.

Поют Тя Ангельския Силы, превозносит человеческий род, благословит Тя вся тварь, Пречистая Дево Богородице. Приими и от мене, недостойнаго, приносимое Тебе хваление.

Пресвятая Богородице, спаси нас.

Пойте, иноцы Афона, благословляй, земле Иверская, превозноси, вся страно Российская, Благую Владычицу, реки чудес от Своея чудотворныя иконы источающую. Хвалим, благословим, покланяемся Ти, Богородице, поюще и превозносяще во вся веки.

Слава: Подобием иконы Иверския не точию святый Афон просвещается, но и стольный град Москва украшается, от того чудесную помощь приемля и источник утешения в нем обретая.

И ныне: Еще и страна Новгородская и инии грады и веси подобием Иверския иконы Твоея, Владычице, освятишася и чудесы просветишася, вопиюще: Господа пойте и превозносите во вся веки.

Песнь 9

Ирмос: Ужасеся о сем Небо и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.

Пресвятая Богородице, спаси нас.

Тайна глубины Рождества Твоего ум Ангельский ужасает, Дево, и пречистая икона Твоя демоны прогоняет, не терпяще бо взирати на силу ея, бегают и исчезают. Мы же той любезно покланяемся и облобызаем и Тя, Богородицу, величаем.

Пресвятая Богородице, спаси нас.

Приидите вси, поклонимся, припадем и возвеличим Божию Матерь, призревшую на нас, смиренных, алчущия исполняющую благ и положившую с нами завет милости во явлении Своея дивныя иконы.

Слава: Богородице Дево, упование христианом, пробави и нашему роду милости Твоя, бывшия отцем нашим, покрый и соблюди нас от всякаго зла.

И ныне: О Всемилостивая христианом Помощнице, не может Тя воспети достойно язык человеческий и Ангельский, яко всея твари честнейшую и земных славнейшую, но приими милостивно сие приносимое Тебе от нас моление и спасай нас всегда, на Тя бо упование возложихом.

МОЛИТВА

Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому образу Твоему. Се бо, грехми погружаемии и скорбьми обуреваемии, взирающе на Твой образ, яко живей Ти сущей с нами приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам, немощным, утоли скорби наша, настави на путь правый нас, заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину и на Страшнем суде Сына Твоего явися нам милосердая Предстательница, да всегда поем, величаем и славим Тя, яко благую Заступницу рода христианскаго, со всеми угодившими Богу, во веки веков. Аминь. источник материала

В чем помогает Иверская икона Божией Матери

Издревле икона Божией матери Вратарница помогает людям в том, чтобы укрепиться в вере и отвести от себя всяческие напасти. Тут может идти речь о недугах телесных и различных недругах. Как известно из истории, Иверская икона всегда помогала в том, чтобы сохранить русскую землю от захватчиков, оберегала монастыри и другие обители веры. Также может использоваться образ и для того, чтобы защищать жилище. Тут значение иконы также относится и к защите от тонких сущностей, ведь образ способен укреплять в вере и исцелять не только телесные, но и духовные недуги.

Вот почему многие выбирают для домашнего алтаря икону Иверской Божьей матери, а молитва, обращенная к ней, защищает дом со всеми обитателями.

Для православного человека собственный дом является подобием храма, поэтому так велико значение домашней иконы Богородицы.

Особое значение имеет Иверская икона для женщин, которым помогает и оберегает, а если смотреть, где вешать икону Вратарница, то вполне возможно уподобиться монастырскому укладу и повесить над дверью или где-то в прихожей.