Акафист Пресвятой Богородице пред иконой «Отрадо» или «Утешение» («Ватопедская»)

А҆ка́ѳїстъ прест҃ѣ́й бцⷣѣ въ че́сть і҆кѡ́ны є҆ѧ̀ ѿра́да [ᲂу҆тѣше́нїе].

Конда́къ а҃.

Возбра́нныхъ си́лъ нбⷭ҇ныхъ ра́дость и҆ хвале́нїе, всегѡ́ же ро́да человѣ́ча и҆справле́нїе, ᲂу҆бл҃жа́емъ тѧ̀, пречⷭ҇таѧ дв҃о мт҃и, ты́ же, на́ше ᲂу҆пова́нїе є҆ди́ное, низпослѝ дꙋша́мъ ѿра́дꙋ бл҃года́тнꙋю, да пое́мъ тебѣ̀, ѻ҆́бразъ ди́вный тво́й чтꙋ́ще:

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

І҆́косъ а҃.

А҆́гг҃лѡвъ ли́цы дивѧ́тсѧ, ѻ҆́бразъ а҆ѳѡ́нскїй тво́й зрѧ́ще, на не́мже, пречⷭ҇таѧ дв҃о и҆ мт҃и, ѿ ᲂу҆́стъ нетлѣ́нныхъ рꙋко́ю десно́ю десни́цꙋ млⷣнца ѿво́диши кро́ткѡ. Что̀ сїѐ є҆́сть зна́менїе ѻ҆́браза; Мы́ же рече́мъ, пою́ще такова̑ѧ:

Ра́дꙋйсѧ, дв҃о, всевы́шнѧгѡ мт҃и: ра́дꙋйсѧ, ди́вный раю̀ бл҃года́ти.

Ра́дꙋйсѧ, на́ша ѿра́до нбⷭ҇наѧ: ра́дꙋйсѧ, лю́демъ наде́ждо и҆звѣ́стнаѧ.

Ра́дꙋйсѧ, ѻ҆́бразъ бо тво́й сп҃се́нїе возвѣща́етъ все́й землѝ: ра́дꙋйсѧ, взо́ръ бо тво́й ᲂу҆тѣше́нїе пребыва́ющымъ во тлѝ.

Ра́дꙋйсѧ, свѣ́те нбⷭ҇ный, мглꙋ̀ на́шихъ дні́й ѡ҆зарѧ́ѧй: ра́дꙋйсѧ, цвѣ́те нетлѣ́нный, тлѣ́нъ на́шихъ дѣ́лъ ѡ҆живлѧ́ѧй.

Ра́дꙋйсѧ, ты́ бо мл҃твы къ сн҃ꙋ за мі́ръ твори́ши: ра́дꙋйсѧ, ꙗ҆́кѡ въ те́плой мл҃твѣ, а҆́ки свѣти́льникъ, гори́ши.

Ра́дꙋйсѧ, ра́достнѡ тѝ восклица́емъ: ра́дꙋйсѧ, пѣ́сненнѡ тѧ̀ воспѣва́емъ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ в҃.

Недоꙋмѣ́етъ ᲂу҆́мъ до́льнїй та́йны твоеѧ̀ разꙋмѣ́ти, пречⷭ҇таѧ бг҃обл҃же́ннаѧ дв҃о, ты́ бо въ ло́но чⷭ҇тое дѣ́йствїемъ дх҃а прїи́мши безсѣ́меннѡ ѻ҆́ч҃ее сло́во, бг҃а человѣ́кѡмъ сочета́еши и҆ пѣ́снь повелѣва́еши всѣ̑мъ пѣ́ти: А҆ллилꙋ́їа.

І҆́косъ в҃.

Го́рꙋ а҆ѳѡ́нскꙋю, дв҃о, сн҃омъ тѝ да́ннꙋю въ жре́бїй, покро́вомъ свои́мъ ѡ҆сѣнѧ́ющи свы́ше, храни́ши ди́внѡ ѿ бѣ́дъ и҆ напа́стей. Бл҃года́тныхъ і҆кѡ́нъ твои́хъ чꙋдесы̀ ѻ҆би́тєли а҆ѳѡ̑нскїѧ сла́вѧтсѧ и҆ гла̑сы прпⷣбными тѧ̀ хва́лѧтъ:

Ра́дꙋйсѧ, дв҃о, ѿра́до въ печа́лехъ: ра́дꙋйсѧ, скоропослꙋ́шнице въ ско́рбехъ.

Ра́дꙋйсѧ, сꙋ́щымъ въ пꙋтѝ ѻ҆диги́трїе: ра́дꙋйсѧ, хра́мѡвъ сщ҃е́нныхъ врата́рнице.

Ра́дꙋйсѧ, до́браѧ предвозвѣ́стнице ᲂу҆ныва́ющымъ въ бѣдѣ̀: ра́дꙋйсѧ, вѣ́рное ᲂу҆тѣше́нїе притека́ющымъ къ тебѣ̀.

Ра́дꙋйсѧ, бѣ̑днымъ бога́тство, є҆леоно́снаѧ же́но: ра́дꙋйсѧ, чтꙋ́щымъ а҆ка́ѳїстъ бл҃говолѧ́щаѧ та́йнѡ.

Ра́дꙋйсѧ, въ ке́ллїи ста́рцꙋ ре́кшаѧ: ра́дꙋйсѧ, чꙋ́днѡ: ра́дꙋйсѧ, живопрїе́мнаѧ мт҃и.

Ра́дꙋйсѧ, тѧ́ бо досто́йно є҆́сть пѣ́ти: ра́дꙋйсѧ, тѧ́ бо по до́лгꙋ всѝ ᲂу҆бл҃жа́емъ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ г҃.

Є҆́ѵинꙋ го́рдꙋю пре́лесть дв҃ы смире́нное: бꙋ́ди, въ ѻ҆ча́хъ млⷭ҇рдагѡ всю̀ ᲂу҆празднѧ́етъ: сѐ сн҃ъ бж҃їй сн҃ъ дв҃ы быва́етъ и҆ бг҃ъ непристꙋ́пный живе́тъ съ человѣ̑ки, тѣ́мже бл҃года́рственное пѣ́нїе немо́лчными ᲂу҆сты̀ возсыла́емъ: А҆ллилꙋ́їа.

І҆́косъ г҃.

Ликостоѧ́ще над̾ мо́ремъ, свѣ́томъ мл҃твы сїѧ́ютъ пред̾ бг҃омъ ст҃ы̑ни а҆ѳѡ́на, и҆ ꙗ҆́вѣ бж҃їѧ мт҃ре сла́ва а҆ѳѡ́на ст҃ы̑ѧ главы̑ ѡ҆сѣнѧ́етъ, къ пѣ́нїю на всѧ́кїй ча́съ призыва́ющи пꙋсты́нники, ю҆̀ воспѣва́ющыѧ:

Ра́дꙋйсѧ, сла́во пꙋсты́нь вожделѣ́нныхъ: ра́дꙋйсѧ, чꙋ́до высо́тъ поднебе́сныхъ.

Ра́дꙋйсѧ, го́ръ и҆ холмѡ́въ ѡ҆сѣне́нїе: ра́дꙋйсѧ, ска́лъ и҆ стремни́нъ ѡ҆сщ҃е́нїе.

Ра́дꙋйсѧ, є҆́юже ѿкрыва́етсѧ пꙋ́ть въ нбⷭ҇ныѧ страны̑: ра́дꙋйсѧ, є҆́юже ѿверза́етсѧ ра́й нетлѣ́нныѧ весны̀.

Ра́дꙋйсѧ, крі́не въ ю҆до́ли, бл҃гоꙋха́ннаѧ ра́досте: ра́дꙋйсѧ, цвѣ́те кра́сный, приснотекꙋ́щаѧ сла́досте.

Ра́дꙋйсѧ, свѣ́та восто́че, до́лы землѝ ѡ҆зари́вый: ра́дꙋйсѧ, жи́зни пото́че, во́дꙋ живꙋ́ю ꙗ҆ви́вый.

Ра́дꙋйсѧ, гла́се немо́лчныхъ моле́нїй: ра́дꙋйсѧ, щи́те сщ҃е́нныхъ селе́нїй.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ д҃.

Ѡ҆ человѣ́честѣмъ ро́дѣ, є҆́же сп҃сти́ ны, ѽ дв҃о, въ мл҃твахъ пред̾ сн҃омъ сладча́йшимъ стои́ши: ѽ мт҃и, лю́демъ бл҃га́ѧ ѿра́до, ты̀ зри́ши бе́зднꙋ грѣхѡ́въ на́шихъ лю́тыхъ, мы́ же въ ро́вѣ и҆стлѣ́нїѧ пове́рженнїи, не смѣ́емъ возвѣстѝ ѻ҆чеса̀ и҆ воспѣ́ти: А҆ллилꙋ́їа.

І҆́косъ д҃.

Ватопе́дскаѧ ѻ҆би́тель сла́витсѧ ѻ҆́бразомъ чꙋ́днымъ, є҆мꙋ́же є҆́сть дре́внее и҆́мѧ ѿра́да. Ѡ҆ не́мъ преда́нїе ста́рецъ бл҃же́нныхъ храни́тъ бл҃года́тнꙋю ди́внꙋю по́вѣсть, во сла́вꙋ бцⷣы застꙋ́пницы, да слы́шаще сїю̀, пое́мъ пречⷭ҇тѣй:

Ра́дꙋйсѧ, мі́ра бл҃га́ѧ ѿра́до: ра́дꙋйсѧ, вѣ̑рнымъ стѣно̀ и҆ ѡ҆гра́до.

Ра́дꙋйсѧ, чꙋ́до чꙋде́съ несказа́нное: ра́дꙋйсѧ, нб҃о нб҃съ ѡ҆сїѧ́нное.

Ра́дꙋйсѧ, безмо́лвїе лю́бѧщымъ кра́ю жела́нїй: ра́дꙋйсѧ, безмѧте́жїѧ и҆́щꙋщымъ раю̀ жела́нный.

Ра́дꙋйсѧ, ꙗ҆́кѡ тобо́ю всѧ́ка дꙋша̀ ѡ҆жива́етъ: ра́дꙋйсѧ, ꙗ҆́кѡ тобо́ю ме́ртвенный ᲂу҆́мъ воскреса́етъ.

Ра́дꙋйсѧ, вѣ́ры горни́ло, и҆́мже невѣ́рїе та́етъ: ра́дꙋйсѧ, та́йнаѧ си́ло, ꙗ҆́же ѿ тлѝ возставлѧ́етъ.

Ра́дꙋйсѧ, сла́во ѿше́льникѡвъ тре́звенныхъ: ра́дꙋйсѧ, крѣ́посте и҆́нокѡвъ бо́дренныхъ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ є҃.

Ро́ждшаѧ жи́знь всемꙋ̀ мі́рꙋ, ꙗ҆́вльшаѧ млⷭ҇ти бе́зднꙋ, ѽ дв҃о пречⷭ҇таѧ, ѻ҆́комъ ꙗ҆снѣ́йшимъ зри́ши на́шихъ печа́лей пꙋчи́нꙋ, слы́шиши гла́сы земны́хъ воздыха́нїй, ско́рѡ на по́мощь къ на́мъ притека́еши, и҆ ᲂу҆чи́ши на́съ пѣ́ти всебл҃го́мꙋ: А҆ллилꙋ́їа.

І҆́косъ є҃.

А҆́лчꙋще зла́та и҆ кро́ве, де́рзкѡ разбѡ́йницы съ мо́рѧ ѻ҆би́тель ст҃ꙋ́ю въ нощѝ ѡ҆блага́ютъ, да ѕѣлѡ̀ заꙋ́тра, вратѡ́мъ ѿворє́ннымъ, ᲂу҆би́вше мона́хѡвъ, расхи́тѧтъ ст҃ы̑ни. Ты́ же, неꙋсы́пнаѧ застꙋ́пнице, ᲂу҆дѣ́лъ сво́й защища́еши, да сла́витъ тѧ̀:

Ра́дꙋйсѧ, ватопе́да ѿра́до: ра́дꙋйсѧ, вра̑жїимъ ко́знемъ прегра́до.

Ра́дꙋйсѧ, за́мыслѡвъ ѕлы́хъ ѡ҆бличе́нїе: ра́дꙋйсѧ, лю́тыхъ врагѡ́въ ѿраже́нїе.

Ра́дꙋйсѧ, ꙗ҆́кѡ не ᲂу҆сыпа́еши, сво́й сп҃са́ющи ᲂу҆дѣ́лъ: ра́дꙋйсѧ, ꙗ҆́кѡ ѿвраща́еши тꙋ́чы смертоно́сныхъ стрѣ́лъ.

Ра́дꙋйсѧ, крѣ́посте чтꙋ́щихъ ст҃ость і҆кѡ́нъ твои́хъ чꙋ́дныхъ: ра́дꙋйсѧ, сто́лпе пою́щихъ сла́вꙋ чꙋде́съ твои́хъ мно́гихъ.

Ра́дꙋйсѧ, кро́ткихъ побѣ́до и҆ пораже́нїе го́рдыхъ: ра́дꙋйсѧ, пра́выхъ защи́то и҆ посрамле́нїе лжи́выхъ.

Ра́дꙋйсѧ, ты́ бо є҆сѝ заблꙋ́ждшихъ корми́ло: ра́дꙋйсѧ, ты́ бо є҆сѝ мл҃твы кади́ло.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ ѕ҃.

Двⷭ҇твенный взо́ръ тво́й, бл҃га́ѧ мт҃и, пото́ки любвѐ и҆ щедро́тъ и҆злива́етъ: ты̀ на́съ храни́ши въ и҆схо́дѣхъ и҆ вхо́дѣхъ, сп҃са́еши вѣ́рныхъ на сꙋ́ши и҆ въ мо́ри, а҆́ще то́кмѡ и҆́скра покаѧ́нїѧ возника́етъ въ се́рдцѣ, є҆́же воспѣва́ти: А҆ллилꙋ́їа.

І҆́косъ ѕ҃.

Ѻ҆́бщїѧ мл҃твы въ ча́съ ᲂу҆́тра и҆́ноцы соверши́вше, ѿидо́ша въ кє́ллїи до лїтꙋргі́и, ѻ҆ба́че и҆гꙋ́менъ ѻ҆би́тели, въ хра́мѣ є҆ди́нъ молѧ́сѧ, ѿ і҆кѡ́ны твоеѧ̀ ѿра́ды гла́съ слы́ша: вра́тъ не ѿверза́йте дне́сь. Тре́петомъ же ѡ҆б̾ѧ́тъ сы́й, си́це ста́рецъ восклица́ше:

Ра́дꙋйсѧ, дв҃о, ꙗ҆́кѡ є҆сѝ стра́жа ст҃ы́ни: ра́дꙋйсѧ, ꙗ҆́кѡ до́мъ тво́й сп҃са́еши ны́нѣ.

Ра́дꙋйсѧ, щи́те заꙋ́тра и҆ но́щїю: ра́дꙋйсѧ, гро́знаѧ си́лою мно́гою.

Ра́дꙋйсѧ, ꙗ҆́кѡ млⷭ҇рдїемъ твои́мъ щади́ши грѣ̑шныѧ: ра́дꙋйсѧ, ꙗ҆́кѡ поража́еши востаю́щыѧ на ны̀ си̑льныѧ.

Ра́дꙋйсѧ, вѣ́нче наде́жды, знаменова́нїе ми́ра: ра́дꙋйсѧ, же́зле побѣ́ды, ѡ҆бѣтова́нїе сла́вы.

Ра́дꙋйсѧ, чи́стый сапфѵ́ре, подо́бный видѣ́нїю не́ба: ра́дꙋйсѧ, свѣ́тлый прⷭ҇то́ле и҆ колесни́це цр҃е́ва.

Ра́дꙋйсѧ, ꙗ҆́кѡ гла́съ тво́й сла́докъ ᲂу҆ши́ма: ра́дꙋйсѧ, ꙗ҆́кѡ ѻ҆́бразъ тво́й красе́нъ ѻ҆чи́ма.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ з҃.

Сн҃ъ чл҃вѣ́ческїй бли́зъ є҆́сть, сꙋ́дъ є҆гѡ̀ стра́шный при две́рехъ, вѣща́етъ на́мъ гла́съ бг҃оно́сныхъ писа́нїй, ѻ҆ба́че неради́мъ ѡ҆ кончи́нѣ, лѣни́вїи сꙋ́ще, и҆ грѡ́знымъ глаго́лѡмъ не вне́млемъ, вси́ бо въ сꙋетѣ̀ пови́ннїи во́лею, ѻ҆ба́че съ вѣ́рою и҆ любо́вїю къ тебѣ̀, бг҃омт҃и, прибѣга́юще, вопїе́мъ бг҃ꙋ: А҆ллилꙋ́їа.

І҆́косъ з҃.

Тре́петнѡ ста́рецъ и҆гꙋ́менъ къ ѻ҆́бразꙋ взо́ръ сво́й возво́дитъ и҆ ви́дитъ: сѐ ли́цы пред̾ ни́мъ ѡ҆жива́ютъ, и҆ дв҃ѣ гро́зный млⷣнцъ рꙋко́ю ᲂу҆ста̀ загражда́етъ, глаго́лѧ: ѽ мт҃и, не провѣщава́й, да нака́жꙋтсѧ. Ста́рецъ же ᲂу҆жаса́ѧсѧ, пое́тъ пречⷭ҇тѣй та́кѡ:

Ра́дꙋйсѧ, дв҃о, влⷣчце мі́ра: ра́дꙋйсѧ, нб҃а цр҃и́це бл҃га́ѧ.

Ра́дꙋйсѧ, ꙗ҆́кѡ бж҃їй гнѣ́въ ᲂу҆толѧ́еши: ра́дꙋйсѧ, ꙗ҆́кѡ гро́зный сꙋ́дъ ѿвраща́еши.

Ра́дꙋйсѧ, мт҃и всемлⷭ҇рдаѧ, и҆збавле́нїе ѿ бѣ́дъ: ра́дꙋйсѧ, по́моще бл҃года́тнаѧ, ᲂу҆пова́нїе дꙋша́мъ.

Ра́дꙋйсѧ, ты́ бо печа̑ли на́шѧ ѿго́ниши ско́рѡ: ра́дꙋйсѧ, ты́ бо болѣ̑зни грѣ́шныхъ врачꙋ́еши ди́внѡ.

Ра́дꙋйсѧ, ꙗ҆́коже ᲂу҆́тро, свѣ́тъ пролива́ющаѧ ти́хїй: ра́дꙋйсѧ, ꙗ҆́коже со́лнце, согрѣва́ющаѧ хла̑дныѧ дꙋ́шы.

Ра́дꙋйсѧ, чꙋ́днаѧ ѻ҆трокови́це: ра́дꙋйсѧ, ди́внаѧ бг҃оневѣ́сто.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ и҃.

Є҆диномы́сленнѡ, дв҃о, взо́ры къ тебѣ̀ ѡ҆браща́емъ, ты́ бо въ де́нь воздаѧ́нїѧ на́съ не ѡ҆ставлѧ́еши: прострѝ ᲂу҆̀бо на́мъ ще́дрꙋю свою̀ рꙋ́кꙋ, грѣхмѝ бо падо́хомъ до а҆́дскїѧ бе́здны, и҆ кто̀ на́съ и҆зба́витъ ѿ грѧдꙋ́щихъ мꙋ́къ, кто́ же на́съ ᲂу҆тверди́тъ, во є҆́же пѣ́ти: А҆ллилꙋ́їа.

І҆́косъ и҃.

Мт҃и ѿво́дитъ десни́цꙋ сла́дкагѡ сн҃а, и҆ ма́лѡ лицѐ ѿклонѧ́ющи, ста́рцꙋ глаго́летъ: на стѣ́ны бра́тїѧ всѧ̀ да выхо́дитъ и҆ лю́тыхъ разбо́йникѡвъ да ѿража́етъ! Ста́рецъ же всю̀ бра́тїю глаша́етъ, и҆ ви́дѣвше всѝ чꙋ́до, воспѣва́ютъ:

Ра́дꙋйсѧ, мт҃и бл҃га́ѧ хрⷭ҇то́ва: ра́дꙋйсѧ, ти́хой пꙋсты́ни покро́ве.

Ра́дꙋйсѧ, а҆́ще и҆ не вѣ́мы, кі́ими тѧ̀ хвале́бными возвели́чимъ словесы̀: ра́дꙋйсѧ, а҆́ще и҆ не вѣ́мы, кі̑ѧ бл҃года̑тныѧ принесе́мъ тѝ

похвалы̑.

Ра́дꙋйсѧ, ꙗ҆́кѡ свѣ́тъ превѣ́чный но́сиши неѡпали́мѡ: ра́дꙋйсѧ, ꙗ҆́кѡ ѻ҆́гнь ѵ҆поста́сный держи́ши непостижи́мѡ.

Ра́дꙋйсѧ, тѧ́ бо и҆́мамы неѡбори́мꙋю стѣ́нꙋ: ра́дꙋйсѧ, тѧ́ бо всѝ вѣ́мы млⷭ҇ти ве́лїю бе́зднꙋ.

Ра́дꙋйсѧ, херꙋві́мѡвъ чтⷭ҇нѣ́йшаѧ: ра́дꙋйсѧ, серафі́мѡвъ сла́внѣйшаѧ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ ѳ҃.

І҆́ѡвъ, страда́лецъ пред̾ бг҃омъ, мꙋ́дреннѡ на́съ поꙋча́етъ, глаго́лѧ: сѐ, бл҃гоче́стїе мꙋ́дрость и҆ бл҃го всѣ̑мъ ᲂу҆ходѧ́щымъ ѿ мі́ра и҆ сла́достный по́двигъ мл҃твы под̾е́мшымъ, и҆̀мже помога́етъ бцⷣа и҆ въ мл҃твахъ ᲂу҆крѣплѧ́етъ, во є҆́же зва́ти: А҆ллилꙋ́їа.

І҆́косъ ѳ҃.

Ра́достнѡ въ хра́мѣ се́мъ зрѧ́ще спи́сокъ съ і҆кѡ́ны ѿра́ды а҆ѳѡ́нскихъ ѻ҆би́телей да́ръ драгоцѣ́нный, въ мл҃твѣ мы́сленнѡ соедини́мсѧ съ хвале́бными ли̑ки а҆ѳѡ́нскихъ ѻ҆тцє́въ, и҆̀же ѿ го́рныхъ высо́тъ, превы́ше ѻ҆́блакъ сꙋ́щихъ, пречⷭ҇тꙋю на́съ пѣ́ти призыва́ютъ:

Ра́дꙋйсѧ, стра́нъ и҆ наро́дѡвъ ст҃ы́не: ра́дꙋйсѧ, всѣ́хъ хрⷭ҇тїа́нъ бл҃госты́не.

Ра́дꙋйсѧ, ѻ҆́гнь во ᲂу҆тро́бꙋ прїи́мшаѧ: ра́дꙋйсѧ, сло́во по пло́ти ꙗ҆ви́вшаѧ.

Ра́дꙋйсѧ, ѻ҆́блаче свѣ́та ле́гкїй, въ мі́ръ прине́сшїй хрⷭ҇та̀: ра́дꙋйсѧ, лѣ́ствице, ведꙋ́щаѧ ѿ землѝ въ нб҃са̀.

Ра́дꙋйсѧ, ста́мно ма́нны а҆́лчꙋщымъ сла́дкїѧ пи́щи: ра́дꙋйсѧ, ча́ше злата́ѧ жа́ждꙋщымъ но́вагѡ пи́ва.

Ра́дꙋйсѧ, ти́хаѧ а҆́гг҃лѡвъ сла́во: ра́дꙋйсѧ, лю́демъ бл҃га́ѧ ѿра́до.

Ра́дꙋйсѧ, вы́шнее нб҃о, свѣ́тъ ѡ҆зарѧ́ющее вѣ̑рнымъ: ра́дꙋйсѧ, тꙋ́чнаѧ ни́во, всѣ̑мъ веселѧ́щаѧ дꙋ́шы.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ і҃.

Оу҆́мъ къ нб҃сѝ ᲂу҆стреми́вше, чꙋ̑вства возне́сше над̾ тлѣ́номъ, ѽ ко́ль вожделѣ́ннѡ сп҃сти́сѧ ѿ мі́ра, и҆мꙋ́ще є҆ди́но дꙋ́ха стремле́нїе къ гѡ́рнимъ, є҆ди́нꙋ се́рдца наде́ждꙋ на бг҃а. Помога́й на́мъ, дв҃о бцⷣе, и҆ въ пꙋ́ть ведѝ на́съ пра́вый, є҆́же пѣ́ти: А҆ллилꙋ́їа.

І҆́косъ і҃.

Ѻ҆́бразъ чтⷭ҇ны́й провожда́ѧ въ пꙋ́ть ѿ а҆ѳѡ́на на сѣ́веръ въ покро́въ бл҃года́тный ѻ҆би́тели но́выѧ, въ зало́гъ нбⷭ҇ныѧ по́мощи гра́дꙋ, чтⷭ҇ны́й схимона́хъ ст҃ого́рецъ вѣща́етъ: сѐ бл҃гослове́нїе влⷣчцы! Моли́тесѧ, и҆ вѣ́рꙋйте, и҆ по́йте:

Ра́дꙋйсѧ, ꙗ҆́кѡ є҆сѝ на́мъ покро́въ бл҃года́тный: ра́дꙋйсѧ, ꙗ҆́кѡ є҆сѝ на́мъ зало́гъ ᲂу҆пова́нїй.

Ра́дꙋйсѧ, сꙋ́щымъ въ бѣда́хъ ᲂу҆тѣше́нїе: ра́дꙋйсѧ, сꙋ́щымъ въ грѣха́хъ ᲂу҆миле́нїе.

Ра́дꙋйсѧ, ꙗ҆́кѡ въ ча́съ гнѣ́ва бж҃їѧ ᲂу҆крѣплѧ́еши сердца̀: ра́дꙋйсѧ, ꙗ҆́кѡ въ де́нь и҆спыта́нїѧ ᲂу҆мꙋдрѧ́еши ᲂу҆мы̀.

Ра́дꙋйсѧ, ꙗ҆́кѡ ѕлы́хъ навѣ́тѡвъ тꙋ́чы ѿ на́съ ѿвраща́еши: ра́дꙋйсѧ, ꙗ҆́кѡ въ го́ды бѣ́дствїй ѿ поги́бели на́съ и҆з̾има́еши.

Ра́дꙋйсѧ, ꙗ҆́кѡ во дни̑ бꙋ́рь безбо́жныхъ ты̀ є҆сѝ на́мъ є҆ди́наѧ при́стань: ра́дꙋйсѧ, ꙗ҆́кѡ мꙋдрова́нїй ло́жныхъ на́съ и҆збавлѧ́еши при́снѡ.

Ра́дꙋйсѧ, въ жи́зни на́мъ ти́хаѧ ра́досте: ра́дꙋйсѧ, въ вѣ́чности ра́йскаѧ сла́во.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ а҃і.

Тє́мныѧ си̑лы въ мі́рѣ си́лою и҆ сла́вою владѣ́ютъ и҆ свѣ́та хрⷭ҇то́ва позна́ти не мо́гꙋтъ, но вѣ̑рнымъ то́кмѡ мл҃тва є҆́сть си́ла, и҆̀мъ сле́зы зало́гъ и҆ побѣ́ды, и҆ сла́вы. Ѽ дв҃о мт҃и, да́ждь на́мъ тꙋ́чꙋ сле́знꙋю и҆ бо́дрственный на́мъ вѣ́тръ возвѣ́й, пою́щымъ: А҆ллилꙋ́їа.

І҆́косъ а҃і.

Ра́дость на ли́цахъ сїѧ́етъ, гла́съ вопїе́тъ ѿ а҆ѳѡ́на: влⷣчца ше́ствꙋетъ къ ва́мъ, и҆сходи́те, срѣта́йте дв҃ꙋ нб҃съ со свѣща́ми, срѣта́йте же па́че сїю̀ со слеза́ми ра́дости, любвѐ и҆ ᲂу҆миле́нїѧ и҆ пра́зднꙋйте, и҆ свѣ́тлымъ гла́сомъ по́йте:

Ра́дꙋйсѧ, кївѡ́те ѡ҆сщ҃е́нный: ра́дꙋйсѧ, прⷭ҇то́ле вознесе́нный.

Ра́дꙋйсѧ, го́рнихъ чинѡ́въ воспѣва́нїе: ра́дꙋйсѧ, а҆́довыхъ си́лъ трепета́нїе.

Ра́дꙋйсѧ, ꙗ҆́кѡ є҆сѝ весе́лїе человѣ́чєскимъ сердца́мъ: ра́дꙋйсѧ, ꙗ҆́кѡ є҆сѝ сп҃се́нїе соврати́вшымсѧ дꙋша́мъ.

Ра́дꙋйсѧ, ꙗ҆́кѡ гла́съ тво́й пресла́дкїй вѣ́чнꙋю ра́дость вѣща́етъ: ра́дꙋйсѧ, ꙗ҆́кѡ взо́ръ тво́й прети́хїй на́мъ тишинꙋ̀ ѡ҆бѣща́етъ.

Ра́дꙋйсѧ, ꙗ҆́кѡ сн҃а и҆ бг҃а ты̀ ᲂу҆молѧ́еши ѡ҆ лю́дехъ: ра́дꙋйсѧ, ꙗ҆́кѡ ра́йскихъ черто́гѡвъ ты̀ на́мъ ѿверза́еши двє́ри.

Ра́дꙋйсѧ, хра́мино дх҃а ст҃а́гѡ: ра́дꙋйсѧ, ски́нїе бг҃а жива́гѡ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ в҃і.

А҆́гг҃льски дне́сь воспѣва́емъ пѣ́снь бл҃года́тнѣй мр҃і́и: сїѧ́ бо є҆́сть сла́дость, и҆ ра́й, и҆ бл҃же́нство, ѿра́да въ ча́съ и҆спыта́нїй и҆ гнѣ́ва, наде́жда бл҃же́нствъ безконе́чныхъ по сме́рти. Ра́дꙋйсѧ ᲂу҆̀бо, застꙋ́пнице ᲂу҆се́рднаѧ, и҆ ра́дость подава́й на́мъ пѣ́ти бг҃ꙋ: А҆ллилꙋ́їа.

І҆́косъ в҃і.

Да защити́тъ бг҃омт҃и ѻ҆́бразомъ ди́внымъ ѿра́ды мл҃твы ѡ҆пло́тъ, монасты́рь се́й и҆ хра́мы, да во вѣ́къ не ᲂу҆га́снетъ лампа́да пред̾ ли́комъ сп҃си́тельнымъ дв҃ы, со́нми же мона́хѡвъ гла́сомъ ра́дости съ мїрⷤны немо́лчнѡ взыва́ютъ:

Ра́дꙋйсѧ, хра́ме, свѣтлѣ́йшїй сїѡ́на: ра́дꙋйсѧ, свѣ́те и҆ сла́во а҆ѳѡ́на.

Ра́дꙋйсѧ, и҆́нокѡвъ мы́сль непреста́ннаѧ: ра́дꙋйсѧ, дѣ́вственныхъ пѣ́снь неꙋмо́лчнаѧ.

Ра́дꙋйсѧ, ꙗ҆́кѡ ро́сꙋ ᲂу҆тѣше́нїѧ посыла́еши во дни̑: ра́дꙋйсѧ, ꙗ҆́кѡ сле́зы ᲂу҆миле́нїѧ и҆сторга́еши въ нощѝ.

Ра́дꙋйсѧ, ди́вное и҆́мѧ, чꙋдотворѧ́щее вта́йнѣ: ра́дꙋйсѧ, бж҃їе мѵ́ро, въ мі́ръ и҆злїѧ́нное ще́дрѡ.

Ра́дꙋйсѧ, ꙗ҆́кѡ тобо́ю лїе́тсѧ на́мъ свѣ́тъ безконе́чный: ра́дꙋйсѧ, ꙗ҆́кѡ съ тобо́ю вѣ́чнѡ млⷣнцъ предвѣ́чный.

Ра́дꙋйсѧ, свѣ́тлосте лю́демъ, тѧ̀ чтꙋ́щымъ: ра́дꙋйсѧ, ра́досте на́мъ, тѧ̀ пою́щымъ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ г҃і.

Ѽ всепречⷭ҇таѧ дв҃о, свѣ́тлаѧ на́ша ѿра́до, сладча́йшагѡ сн҃а нетлѣ́ннаѧ мт҃и! Ѿ всѧ́кихъ бѣ́дъ и҆ скорбе́й ѡ҆гражда́й на́съ и҆ бꙋ́дꙋщїѧ мꙋ́ки и҆змѝ на́съ, бл҃га́ѧ, ра́дости же вѣ́чныѧ сподо́би на́съ ᲂу҆ го́рнѧгѡ прⷭ҇то́ла воспѣва́ти: А҆ллилꙋ́їа.

Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.

І҆́косъ а҃.

Ра́дꙋйсѧ, дв҃о, всевы́шнѧгѡ мт҃и: ра́дꙋйсѧ, ди́вный раю̀ бл҃года́ти.

Ра́дꙋйсѧ, на́ша ѿра́до нбⷭ҇наѧ: ра́дꙋйсѧ, лю́демъ наде́ждо и҆звѣ́стнаѧ.

Ра́дꙋйсѧ, ра́достнѡ тѝ восклица́емъ: ра́дꙋйсѧ, пѣ́сненнѡ тѧ̀ воспѣва́емъ.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Конда́къ а҃.

Ра́дꙋйсѧ, бж҃їѧ мт҃и, свѣ́тлаѧ на́ша ѿра́до.

Мл҃тва.

Ѽ прест҃а́ѧ влⷣчце гпⷭ҇жѐ дв҃о бцⷣе, невѣ́сто нетлѣ́ннаѧ, мт҃и бл҃гослове́ннаѧ, свѣ́тлаѧ на́ша ѿра́до, вожделѣ́нное ᲂу҆тѣше́нїе!

Прїимѝ ны́нѣ дерзнове́нное и҆ неѿстꙋ́пное моле́нїе сїѐ, ѿ грѣ́шныхъ ᲂу҆сте́нъ и҆ недосто́йныхъ дꙋ́шъ тебѣ̀ приноси́мое пред̾ ст҃ы́мъ и҆ свѣтоза́рнымъ твои́мъ ѻ҆́бразомъ.

Пощади́ ны, млⷭ҇тиваѧ и҆ млⷭ҇рдаѧ и҆ щедролюби́ваѧ на́ша застꙋ́пнице, и҆ не преда́ждь на́съ сꙋдꙋ̀ и҆ гнѣ́вꙋ сн҃а твоегѡ̀ и҆ сп҃са на́шегѡ, гдⷭ҇а і҆и҃са хрⷭ҇та̀, є҆мꙋ́же без̾ числа̀ согрѣши́хомъ и҆ пови́нни є҆смы̀ ѡ҆сꙋжде́нїю и҆ пра́ведномꙋ є҆гѡ̀ и҆зрече́нїю, є҆́же наказа́тисѧ по грѣхѡ́мъ на́шымъ, превозше́дшымъ всѧ́кꙋю мѣ́рꙋ є҆гѡ̀ долготерпѣ́нїѧ.

Прини́кни съ высо́тъ твои́хъ го́рнихъ, и҆дѣ́же а҆́гг҃ли тре́петнѡ сла́вѧтъ тѧ̀, и҆ воззрѝ на на́шꙋ до́льнюю нищетꙋ̀: ка́кѡ ѡ҆бнища́хомъ вѣ́рою, ка́кѡ бѣ́дствꙋемъ наде́ждею и҆ ѡ҆скꙋдѣ́хомъ любо́вїю, ка́кѡ ᲂу҆мо́мъ ѡ҆мрачи́хомсѧ, се́рдцемъ же и҆ чꙋ́вствы ѡ҆жесточи́хомсѧ. Оу҆врачꙋ́й на́съ мл҃твою твое́ю, дв҃о цѣле́бнице. Возста́ви ны̀, па́дшыѧ дꙋ́хомъ, ᲂу҆крѣпѝ разсла́блєнныѧ ᲂу҆мо́мъ, возбꙋдѝ ᲂу҆ны̑лыѧ и҆ ѿча̑ѧнныѧ, и҆сцѣлѝ болѧ́щыѧ дꙋше́ю и҆ тѣ́ломъ.

При́зри на гра́дъ се́й [и҆лѝ: ѻ҆би́тель сїю̀, и҆лѝ: ве́сь сїю̀] и҆ пощадѝ є҆го̀ [и҆лѝ: ю҆̀], бж҃їй ѿводѧ́щи твои́мъ предста́тельствомъ гнѣ́въ. Оу҆кротѝ го́рдѡстнаѧ стремлє́нїѧ люде́й и҆ бг҃оѿстꙋ̑пнаѧ и҆̀хъ шата̑нїѧ. Возвѣ́й ти́хое дыха́нїе бл҃года́ти твоеѧ̀ на смѧтє́нныѧ дꙋ́шы и҆ сокрꙋшє́ннаѧ сердца̀.

Сохранѝ сꙋпрꙋ́жествꙋ чистотꙋ̀, матери́нствꙋ че́сть, дѣ́вствꙋ бл҃гослове́нїе. Низпослѝ под̾ кро́въ жили́щъ на́шихъ ѡ҆сщ҃а́ющїй лꙋ́чь бжⷭ҇твеннагѡ свѣ́та, да ѡ҆блича́тсѧ дѣѧ́нїѧ неподѡ́бнаѧ и҆ ᲂу҆стыдѧ́тсѧ рѣ̑чи хꙋ̑льныѧ, и҆ ᲂу҆кротѧ́тсѧ мы̑сли ѕлѡ́бныѧ.

Ѽ миролюби́ваѧ, бл҃гостнѣйшаѧ и҆ тиша́йшаѧ дв҃о мт҃и, ѡ҆ паде́нїихъ на́шихъ скорбѧ́щаѧ, ѡ҆ сп҃се́нїи на́шемъ воздыха́ющаѧ! Оу҆толѝ цр҃кѡ́вныѧ бꙋ̑ри, ᲂу҆мирѝ раско́лы, соберѝ расточє́нныѧ, ѡ҆братѝ ѿпа́дшыѧ и҆ всѣ́хъ приведѝ въ є҆дине́нїе ст҃ы́ѧ цр҃кве, да є҆динодꙋ́шнѡ и҆ є҆диномꙋ́дреннѡ сла́витсѧ на землѝ, ꙗ҆́коже и҆ на нб҃сѝ, є҆ди́ное ст҃ѣ́йшее и҆ сп҃си́тельное и҆́мѧ є҆диносꙋ́щныѧ трⷪ҇цы, ѻ҆ц҃а̀, и҆ сн҃а, и҆ ст҃а́гѡ дх҃а, во вѣ́ки вѣкѡ́въ. А҆ми́нь.

Акафист Пресвятой Богородице перед Ея иконой, именуемой “Отрада”, или “Утешение” (Вадопедская)

Кондак 1 Взбранной Воеводе Победительная, яко избавльшеся от злых, благодарственная восписуем Ти раби Твои, Богородице, но яко имущая державу непобедимую от всяких нас бед и скорбей свободи, да зовем Ти: Радуйся, Радосте наша, отраду и утешение верным дарующая.

Икос 1 Ангел множество и вся небесныя воинства славят Тебе, Матерь всех Богородицу, яко источаеши радости и утешения сердцам человеков в скорби обретающихся. Тем же и мы печальми обремененнии, надежду спасения в Тебе улучивши, умиленно взываем: Радуйся, материнское к нам грешным благоволение; Радуйся, прибегающих к Тебе крепкое заступление. Радуйся, Божественный благости Подательнице; Радуйся, христианского рода Заступление. Радуйся, яко Тебе вся колена земная Материю Божиею исповедуют; Радуйся, яко Твоими молитвами скорби наша утишаются. Радуйся, Твоим ходатайством прошения благая наша исполняются; Радуйся, благодать и милость иконами Твоими нам являющая. Радуйся, мир от потопа греховнаго спасающая; Радуйся, яко молящиеся Тебе от всякаго зла сохраняются. Радуйся, яко Твои честныя иконы чудесами прославляются; Радуйся, Радосте наша, отраду и утешение верным дарующая. Кондак 2 Видя чудес множество от честных икон Твоих изливающееся, яко Ты еси молящихся Благая Помощнице, обидимых Заступнице, ненадеющихся Надеждо, скорбных Отрада и Утешение, болящих исцеление, труждающихся помоще, благодарственно вопием о Тебе Богу: Аллилуиа.

Икос 2 Разум подаждь нам, Всеусердная Предстательнице наша, в находящих на нас лютых скорбех к Тебе прибегати, утешения ищущи. Ты же яко Благая, не остави нас во всякой требуемой нам помощи, да таковую получивше взываем Тебе радостно: Радуйся, обуреваемых тихое пристанище; Радуйся, сомневающихся известное утверждение. Радуйся, скорая Помощнице в скорбех и напастех; Радуйся, теплая Заступнице во всяких обстояниях. Радуйся, печали наша Твоим утешением умоляющая; Радуйся, скорбями грехи наша очищающая. Радуйся, в страданиях наших утешение нам подавающая; Радуйся, от внезапныя смерти без покаяния молящихся Тебе избавляющая. Радуйся, от враг видимых и невидимых нас охраняющая; Радуйся, от нападения злых человек спасающая. Радуйся, во всяких нуждах прибегающим к Тебе помогающая; Радуйся, Радосте наша, отраду и утешение верным дарующая.

Кондак 3 Силою свыше укрепи нас, Благая Владычице, к Твоему заступлению с верою притекающих и Твоего посещения и промышления сподоби, мрак уныния и скорбей облегших нас отгоняя, да спасаеми Тобою вопием Богу: Аллилуиа.

Икос 3 Имущи богатство милосердия неизреченное, всем просящим руку помощи простираеши, недуги врачуя, скорби утоляя, страсти угашая. Не презри нас, Благая Владычице, в печалях и скорбех наших к Тебе притекающих и вопиющих: Радуйся, Единая всех Мати, милосердие нам являющая; Радуйся, милости Своей сокровищницу всем открывающая. Радуйся, родителей скорбящих о чадах своих заблудших печаль утоляющая; Радуйся, вдовствующих подкрепляющая. Радуйся, сиротствующих добре устрояющая; Радуйся, всех скорбящих утешение. Радуйся, отчаявающихся едина Надеждо; Радуйся, изнемогающих от уныния Заступнице и подкрепление. Радуйся, болящих телом и душею благонадежное посещение; Радуйся, различными недугами одержимых премудре уврачевание. Радуйся, яко Тобою по мере веры подается совершенное исцеление немоществующим; Радуйся, Радосте наша, отраду и утешение верным дарующая.

Кондак 4 Буря многих бед и напастей содержит нас и волнения их в мире терпим. Ты же, яко Милостивая Мати Спаса нашего Господа, воздвигни руце к Сыну Твоему, да призрит на лютыя сердец наших и исхитит нас из пучины отчаяния, вопиющих Ему: Аллилуиа.

Икос 4 Слышащи, Пресвятая Дево и Мати, яко являла и являеши многую милость роду христианскому, не оставляй нас во дни скорби и напасти и избавление от сих даруй, молим Тя: храни и заступи всех нас от всякия беды и печали, да в мире воспеваем Ти сице: Радуйся, Заступнице наша, Твоим всемощным заступлением от всякия нужды нас избавляющая; Радуйся, усердное моление ко Господу о нас приносящая. Радуйся, Своим предстательством праведный гнев Божий утоляющая; Радуйся, на милость Его к нам приклоняющая. Радуйся, Твоею помощию уповающих на Тя не оставляющая; Радуйся, добре подвизающихся укрепляющая. Радуйся, на благое и душеполезное нас наставляющая; Радуйся, души обремененныя заботами житейскими к попечению духовному направляющая. Радуйся, всех верных благое мздовоздание; Радуйся, в забвении долга и чести живущих правосудное наказание. Радуйся, в пленении, во узах сущих подкрепление и возвращение; Радуйся, Радосте наша, отраду и утешение верным дарующая.

Кондак 5 Богосветлые чины ангельския славят Тебе, яко Матерь всех и Богородицу. Мы же Тебе, Заступнице нашей, поклоняющеся, умиленное благоволение приносим и уповающи на Твою милость смиренно молим Тя: милостива пребуди к нам, Владычице, и избави нас от бед и скорбей, да всегда прославляем Твое милосердие зовуще Богу: Аллилуиа.

Икос 5 Видеша силы небесныя, яко Твоею молитвою гнев Божий утоляется, прославляют и величают Твое милосердие. Мы же грешнии на земли зряще Тебе, изображенную Пречистую Богоматерь, умиленно взываем: Радуйся, Матерь рода христианского, милосердие нам являющая; Радуйся, у Престола Сына Твоего непрестанно о христианах молящаяся. Радуйся, любовию Своею грехи наши покрывающая; Радуйся, Твоею милостию нас заступающая. Радуйся, источник отрады и утешения всем источающая; Радуйся, от междоусобия и распри нас охраняющая. Радуйся, вражду и ненависть миром и любовию утоляющая; Радуйся, скорбь и смущение сердец наших умиляющая. Радуйся, гневливостью одержимых вразумляющая; Радуйся, в мире со всеми живущих Отрада и Утешение. Радуйся, суетная прелести мира сего презирати нас научающая; Радуйся, Радосте наша, отраду и утешение верным дарующая.

Кондак 6 Проповедуют милости и чудеса Твоя, Богомати, вси люди православнии, ибо честным Своим покровом охраняеши весь род христианский. Тем же вопием Ти: избави Твоими молитвами всех нас от бед и напастей, да воспоим вси Богу: Аллилуиа.

Икос 6 Возсия благодать светозарная от пречудных икон Твоих, Богомати, пред ними мы припадающе молим Тя: отгони облак нашедших на нас искушений, да вопием Ти: Радуйся, честныя иконы Твоя чудесами прославляющая; Радуйся, молящимся пред сими иконами с верою прошения исполняющая. Радуйся, в бедах сущих заступающая; Радуйся, уповающим на Тя спасение подающая. Радуйся, Предстательница пред Богом, за всех нас молящаяся; Радуйся, Заступнице рода христианского, от Бога нам дарованная. Радуйся, яко Ты еси храмов наших первейшее украшение; Радуйся, домов христианских благословение. Радуйся, православных людей Покров и Заступление; Радуйся, всего мира очищение. Радуйся, вся благополезны просящим у Тебе дарующая; Радуйся, Радосте наша, отраду и утешение верным дарующая. Кондак 7 Хотящи явити милосердия Своего бездну повелела, Пречистая, игумену обители Ватопедския на Афоне врат обители их не отверзати, да избегнут Твоим ходатайством по суду Божию предстоявшего нападения вражескаго и тако избавльшеся милостию Твоею беды и напасти вси иноцы воспеша Богу: Аллилуиа.

Икос 7 Дивное чудо явила, Богомати, инокам спасение, от святыя иконы Своея изрекла еси, но и зрак лика Твоего Пречистаго Сына сущии на иконе изменила еси. Сего ради видевше чудо сие велие и преславное вси люди возопиша Ти: Радуйся, святыя иконы Своя на земли во спасение всем явити благоизволившая; Радуйся, иконами Своими милосердное нам заступление являющая. Радуйся, чрез святыя изображения Твоя чудеса и ныне источающая; Радуйся, ими наша скорби и печали утоляющая. Радуйся, яко на икону Твою взирающе Тебе Самой поклоняемся; Радуйся, Твоим милостивым заступлением мы грешнии спасаемся. Радуйся, Твоими святыми иконами град наш освятившая; Радуйся, теми сердца верующих возвеселившая. Радуйся, грады и веси Российския Своими чудотворными иконами от разорения спасшая; Радуйся, страну нашу от порабощения избавлявшая. Радуйся, утешением и радостию молящихся пред Твоею честною иконою возвеселяющая; Радуйся, Радосте наша, отраду и утешение верным дарующая.

Кондак 8 Странники и пришельцы на земли вси есмы, по глаголу Апостолову: беды от врагов, скорби от близких, печали от лжебратии и сродник терпяще, в лишениях многих. Ты же, Владычице, яко Милостивая Утешительнице, настави нас к тихому пристанищу и моли Сына Твоего утешение и радости нам даровати, да всегда вопием Ему: Аллилуиа.

Икос 8 Все житие наше на земли болезненно и печали бывает причастно: слава не стоит, богатство мимо течет, друзи и искреннии смертию отъемлются, немоществует тело, изнемогает и дух наш. К Тебе убо прибегаем, о Богомати, пред Пречистою иконою Твоею припадающе, исполни радости и утешения скорбное сердце наше, да вопием Ти: Радуйся, всех к Тебе прибегающих милостию Своею покрывающая; Радуйся, Милостивая, и нас милующая. Радуйся, Домостроительнице, жизнь нашу добре устрояющая; Радуйся, отрадою и утешением печали наши утоляющая. Радуйся, с Сыном Твоим и Богом вечно царствующая; Радуйся, Ему о нас моления всегда приносящая. Радуйся, жестокость сердца нашего умягчающая; Радуйся, отчаявшихся надеждою возвеселяющая. Радуйся, Твоим заступлением враждующия на нас отводящая; Радуйся, от козней духа злобы нас спасающая. Радуйся, верующим противу диавола силу и мужество подающая; Радуйся, Радосте наша, отраду и утешение верным дарующая.

Кондак 9 Всякое естество ангельское виде Тя, Богомати, у Престола Сына Твоего, предстоящую и за вся христианы молящуюся, восхваляет Тя, яко сильным Своим предстательством грешных заступаеши, прибегающих к Тебе от бед избавлявши, печали наша отрадою утоляеши и молишися о всех верою зовущих: Аллилуиа. Икос 9 Витийство человеческое не возможет по достоянию восхвалити Тя, Пресвятая Богородице, и воспети неисчетныя чудеса Твоя, ими же нас просвещаеши. Мы же Твои благодеяния ведающе, душею радующеся Тебе глаголем: Радуйся, от напастей Твоим предстательством нас защищающая; Радуйся, от всяких бед Своим ходатайством нас изимающая. Радуйся, от належащего праведнаго прещения Божия Твоим умилением нас освобождающая; Радуйся, от нашествия вражия нас спасающая. Радуйся, от домашния вражды и брани единокровных миром ограждающая; Радуйся, от смертоносныя язвы прибегающих к Тебе с несумненную верою исцеляющая. Радуйся, правосудие Божие умилостивляющая; Радуйся, страны нашея православныя Защитнице. Радуйся, всех верующих Благая Заступнице; Радуйся, всех труждающихся помощь и укрепление. Радуйся, теплая за всех нас Предстательнице; Радуйся, Радосте наша, отраду и утешение верным дарующая.

Кондак 10 Спасти хотя род человеческий от вечныя муки и прелести вражия Человеколюбец Господь Тебе, Матерь Свою, дарова земным во отраду и утешение, да будеши обидимым Заступнице, отчаявающимся Надеждо, скорбящим радование, печальным утешение и всех в нуждах и напастех к Тебе прибегающих спасаеши вопиющих верно: Аллилуиа.

Икос 10 Стена еси и заступление всем с верою и любовию притекающим к Тебе, Пречистая Владычице, тем же молим Тя: заступи и покрый и огради всех сирых и безпомощных нас от искушений, озлоблений и бед с любовию взывающим: Радуйся, Мати Божия, любовию материнскою нас возлюбившая; Радуйся, яко Твоя материнская молитва много может, Владыку умилостивляющая. Радуйся, Милосердная, двери милосердия Божия нам отверзающая; Радуйся, к делам милосердия нас возбуждающая. Радуйся, Святыя Заповеди исполняти нас научающая; Радуйся, любити своего ближняго нас наставляющая. Радуйся, грешники к покаянию призывающая; Радуйся, находящий на нас облак печалей и скорбей разсеявающая. Радуйся, пламень страстей наших угасающая; Радуйся, мрак искушений изгоняющая. Радуйся, Твоим к Богу прошением вся полезная нам подающая; Радуйся, Радосте наша, отраду и утешение верным дарующая.

Кондак 11 Пение всеумиленное приносим Ти раби Твои, Богородице, яко всесильней Заступнице рода христианского: к Тебе бо в напастех и скорбех прибегаем и пред Тобою в бедах наших слезы проливаем, поюще Богу: Аллилуиа.

Икос 11 Светозарно сияют иконы Твои святыя, проявленныя на освящение наше и утешение. Мы же с любовию чтуще их с верою припадаем пред ними и вопием Ти: Радуйся, Мати Бога Истиннаго, благочестивыя души просвещающая; Радуйся, Утешительница наша, обремененныя сердца умиряющая. Радуйся, всем Тебя призывающим руку помощи простирающая; Радуйся, Тебе Материю Божией именующим и почитающим нам непрестанно помогающая. Радуйся, уповающим на Тя и в вере живущим непостыдный конец живота подающая; Радуйся, во внезапных бедах на нас находящих подкрепляющая. Радуйся, от насилия и от внезапныя смерти охраняющая; Радуйся, от татей ограждающая. Радуйся, в сердцах наших зависть и небратолюбие искореняющая; Радуйся, от наветов, клеветы и поношений защищающая. Радуйся, отступающих от веры и церкви вразумляющая и на путь правый возвращающая; Радуйся, Радосте наша, отраду и утешение верным дарующая.

Кондак 12 Благодать Божественную испроси нам у Сына Твоего, Пречистая Богородительнице, и простри руку помощи, покрый нас кровом крилу Твоею, избави от облежащия беды и напастей, отгони от нас всякаго врага, и супостата, умири нашу жизнь, Владычице, и в печалех бедствующим помози, да спасаеми Тобою воспеваем Богу: Аллилуиа.

Икос 12 Поюще Твои милости и чудеса, Богородительнице, хвалим Тя вси, яко твердую Предстательницу нашу, веруем и надеемся, яко испросиши, Благая, временная и вечная всем воспевающим Тя сице: Радуйся, непостыдное наше Упование в животе и по представлении нашем; Радуйся, уповающим на Тя в мире конец живота подающая. Радуйся, всех искренне верующих благословляющая; Радуйся, маловерных и суеверных вразумляющая. Радуйся, непочитающих икон Твоих святых наказующая; Радуйся, поклоняющимся иконам Твоим и Тя на помощь призывающим помогающая. Радуйся, гордостию ума одержимых и от святыя Церкви отходящих смиряющая; Радуйся, благами мира сего прельщающихся и попечение сугубое о них имущих светом блага истиннаго озаряющая. Радуйся, в юности доброму и чистому житию Наставнице; Радуйся, в старости от сердечнаго окаменения Охранительнице. Радуйся, Радосте наша, отраду и утешение верным дарующая.

Кондак 13 О, Всепетая и Всемилостивая Мати, Пречистая Госпоже Богородице! Услыши глас молящихся рабов Твоих и приемши сие малое моление наше, избави нас от всяких бед, скорбей и напастей: подаждь нам в жизни руку помощи, враги наша разжени, недуги наша исцели, всякую злобу и вражду отжени от нас, в печалех житейских отраду и утешение даруй и будущия изми муки о Тебе вопиющих: Аллилуиа, аллилуиа, аллилуиа.

(Этот кондак читается трижды, затем икос 1 и кондак 1)

Молитва первая Надежда всем концем земли, Пречистая Дево Богородице, Утешение и Отрадо наше! Не гнушайся нас грешных, на Твою бо милость уповаем. Угаси пламень греховный и покаянием ороси изсохшие сердца наша. Очисти ум наш от греховных помышлений. Приими моления от души и сердца с воздыханием Тебе приносимыя. Буди Ходатаице о нас к Сыну Твоему и Богу и отврати гнев Его от нас Матерними молитвами. Укрепи в нас веру православную, вложи в нас дух страха Божия, дух смирения, терпения и любви. Душевныя и телесныя язвы исцели, утиши бурю злых нападений вражеских. Отыми бремя грехов наших и не остави нас до конца погибнути. Подаждь нам милость Твою и святое благословение Свое всем зде предстоящим и молящимся и всегда пребываяй с нами, подавая приходящим к Тебе отраду и утешение, помощь и заступление, да славим и величаем Тя вси до последняго нашего воздыхания. Аминь. Молитва вторая О Пресвятая Дево, Мати Господа, Царице Небесе и земли! Вонми многоболезненному воздыханию души нашея, призри с высоты святыя Твоея на нас, с верою и любовию поклоняющихся Пречистому образу Твоему. Се бо грехми погружаемии и скорбьми обуреваемии, взирая на Твой образ, яко живей Ти сущей с нами, приносим смиренная моления наша. Не имамы бо ни иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорбь нашу, настави на путь правый нас заблуждающих, уврачуй и спаси безнадежных, даруй нам прочее время живота нашего в мире и тишине проводити, подаждь христианскую кончину, и на страшном суде Сына Твоего явися нам Милосердая Заступница, да всегда поем, величаем и славим Тя, яко благую Заступницу рода христианскаго, со всеми угодившими Богу. Аминь.

Икос

Ангели Тя, Матерь Бога нашего, песньми славословят, и мы земнии воспеваем радостно Тебе вопиюще:

Радуйся, Светодавца селение, Еюже лучи спасения мирови возсияша;

Радуйся Обрадованная, Еюже исполняемся Божественнаго веселия. Радуйся, двере Востока, от врат смертоносных греха нас отводящая;

Радуйся, светильниче пресветлый, просвещаяй омраченных. Радуйся, бездно Божия к нам человеколюбия;

Радуйся, цены всякия превысший дар, нам от Бога дарованный. Радуйся, яко имаши велие к Нему дерзновение;

Радуйся, страже Афона и тамо обитающих Хранительнице. Радуйся, всекрепкая стено, еюже сохраняемся необоримы враги христианскими;

Радуйся, язво невидимых врагов и от них уязвляемых врачевание. Радуйся, безсильных сило и помоще безпомощных;

Радуйся, Отрадо и Утешение скорбящих.

Радуйся, Невесто Неневестная.