Акафист Пресвятой Богородице пред иконой «Спорительница хлебов»

А҆ка́ѳїстъ прест҃ѣ́й бцⷣѣ въ че́сть є҆ѧ̀ і҆кѡ́ны, и҆менꙋ́емыѧ спори́тельница хлѣбѡ́въ.

Конда́къ а҃.

И҆збра́ннѣй ѿ всѣ́хъ родѡ́въ бж҃їей мт҃ри и҆ влⷣчцѣ нб҃сѐ и҆ землѝ, и҆збавлѧ́ющей на́съ ѿ всѧ́кїѧ нꙋ́жды, бл҃года́рственное прино́симъ пѣ́нїе. Ты́ же, всемлⷭ҇тиваѧ гпⷭ҇жѐ бцⷣе, прїимѝ на́ше ᲂу҆се́рдное моле́нїе, сохранѝ на́съ ѿ гла́да и҆ па́гꙋбы, да́рꙋй землѝ на́шей плодоно́сїе, пита́тельнице и҆ спори́тельнице ни́въ и҆ хлѣбѡ́въ на́шихъ, да ра́дꙋющесѧ всегда̀ зове́мъ тѝ:

Ра́дꙋйсѧ, бл҃года́тнаѧ, гдⷭ҇ь съ тобо́ю, пода́ждь и҆ на́мъ недостѡ́йнымъ ро́сꙋ бл҃года́ти твоеѧ̀ и҆ ꙗ҆вѝ млⷭ҇рдїе твоѐ.

І҆́косъ а҃.

А҆́гг҃лѡвъ творе́цъ и҆збра̀ тѧ̀, влⷣчце, къ бл҃года́тномꙋ человѣ́кѡвъ сп҃се́нїю и҆ дарова̀ тѧ̀ помо́щницꙋ лю́демъ, и҆збавлѧ́ющꙋю на́съ ѿ гла́да и҆ всѧ́кихъ напа́стей, житїѐ на́ше до́брѣ ᲂу҆строѧ́ющꙋю въ ми́рѣ и҆ всѧ́комъ дово́льствѣ. Тѣ́мже со ᲂу҆миле́нїемъ взыва́емъ тѝ:

Ра́дꙋйсѧ, бл҃года́тное человѣ́кѡвъ ѿ всѧ́кїѧ нꙋ́жды и҆збавле́нїе: ра́дꙋйсѧ, достоѧ́нїю твоемꙋ̀ по́мощь и҆ застꙋпле́нїе.

Ра́дꙋйсѧ, хрⷭ҇толюби̑выѧ лю́ди ѿ всѧ́кихъ бѣ́дъ сп҃са́ющаѧ: ра́дꙋйсѧ, а҆́лчꙋщихъ пита́ющаѧ.

Ра́дꙋйсѧ, си́рыхъ застꙋпле́нїе: ра́дꙋйсѧ, наги́хъ ѡ҆дѣѧ́нїе.

Ра́дꙋйсѧ, и҆зрасти́вшаѧ на́мъ пло́дъ живота̀: ра́дꙋйсѧ, ро́ждшаѧ сп҃са дꙋ́шъ на́шихъ.

Конда́къ в҃.

Ви́дѣвъ сн҃ъ тво́й, бг҃омт҃и, вели́кое твоѐ къ лю́демъ млⷭ҇рдїе, глаго́летъ тебѣ̀: просѝ, мт҃и моѧ̀, занѐ не ѿвращꙋ́сѧ тебє̀, но и҆спо́лню всѧ̑ прошє́нїѧ твоѧ̑. Мы́ же прославлѧ́юще сїѐ ди́вное промышле́нїе ѡ҆ ро́дѣ человѣ́честѣмъ, вопїе́мъ бг҃ꙋ: А҆ллилꙋ́їа.

І҆́косъ в҃.

Ра́зꙋмъ нбⷭ҇ный дарова́сѧ прпⷣбномꙋ ста́рцꙋ а҆мвро́сїю, є҆́же водрꙋзи́ти во ѻ҆би́тели, и҆́мъ созда́ннѣй, і҆кѡ́нꙋ прест҃ы́ѧ бцⷣы и҆ нарещѝ ю҆̀ спори́тельница хлѣбѡ́въ, ꙗ҆́кѡ ты̀, прест҃а́ѧ дв҃о, сп҃са́еши лю́ди твоѧ̑ ѿ гла́да, защища́еши ѧ҆̀ ѿ смертоно́снагѡ вре́да и҆ па́гꙋбы, да́рꙋеши землѝ плодоно́сїе, посыла́еши до́ждь ра́ннїй и҆ по́зднїй на ни̑вы и҆ полѧ̀ на́шѧ. Тѣ́мже вопїе́мъ тебѣ̀ такова̑ѧ:

Ра́дꙋйсѧ, дв҃о, хрⷭ҇тїа́нъ похвало̀: ра́дꙋйсѧ, ꙗ҆́кѡ бл҃жа́тъ тѧ̀ всѝ ро́ди.

Ра́дꙋйсѧ, ꙗ҆́кѡ ты̀ хлѣ́бы на́шѧ бл҃гословлѧ́еши и҆ спорѧ́еши: ра́дꙋйсѧ, ꙗ҆́кѡ ты̀ на́съ ѿ гла́да и҆збавлѧ́еши.

Ра́дꙋйсѧ, пита́ющаѧ на́съ хлѣ́бомъ жи́зни: ра́дꙋйсѧ, млеко́мъ пита́вшаѧ пита́телѧ вселе́нныѧ.

Ра́дꙋйсѧ, плода̀ безсме́ртнагѡ стѧжа́нїе: ра́дꙋйсѧ, сади́телѧ жи́зни на́шеѧ ро́ждшаѧ.

Конда́къ г҃.

Си́лою свы́ше ᲂу҆крѣпѝ на́съ, бл҃года́тнаѧ влⷣчце, во дни̑ гла́да и҆ па́гꙋбы, да не поги́бнемъ лю́тѣ без̾ покаѧ́нїѧ во ᲂу҆ны́нїи и҆ ѿча́ѧнїи, но ᲂу҆твердѝ и҆ наста́ви на́съ въ терпѣ́нїи и҆ бл҃гоꙋгожде́нїи бг҃ови, да разꙋмѣ́емъ въ напа́стехъ и҆ ско́рбехъ во́лю є҆гѡ̀ ст҃ꙋ́ю, бл҃гꙋ́ю и҆ соверше́ннꙋю, непреста́ннѡ взыва́юще къ немꙋ̀ хвале́бнымъ гла́сомъ: А҆ллилꙋ́їа.

І҆́косъ г҃.

И҆мꙋ́щи любо́вь ве́лїю къ лю́демъ, и҆скꙋпле́ннымъ чтⷭ҇но́ю кро́вїю сн҃а твоегѡ̀ и҆ бг҃а, бг҃омт҃и пречⷭ҇таѧ, прїѧ́ла є҆сѝ ѿ негѡ̀ вла́сть ᲂу҆строѧ́ти и҆ покрыва́ти ро́дъ хрⷭ҇тїа́нскїй. Ты́ бо бѣ́дствꙋющымъ помо́щница є҆сѝ ско́раѧ, градѡ́мъ и҆ ве́семъ, се́ламъ и҆ ни́вамъ и҆ всемꙋ̀ мі́рꙋ покро́въ. Тебѣ̀, млⷭ҇рдой и҆ бг҃олюби́вой мт҃ри на́шей, ᲂу҆строѧ́ющей и҆ направлѧ́ющей ко сп҃се́нїю земнꙋ́ю жи́знь на́шꙋ, со смире́нїемъ глаго́лемъ:

Ра́дꙋйсѧ, бл҃га́гѡ сн҃а бл҃га́ѧ мт҃и: ра́дꙋйсѧ, непреста́ннѡ молѧ́щаѧсѧ ѡ҆ сп҃се́нїи на́съ грѣ́шныхъ.

Ра́дꙋйсѧ, ѡ҆ все́мъ мі́рѣ хрⷭ҇тїа́нстѣмъ къ бг҃ꙋ хода́таице: ра́дꙋйсѧ, бла̑гъ всѧ́ческихъ всебл҃га́ѧ пода́тельнице.

Ра́дꙋйсѧ, плѣне́нныхъ и҆ въ темни́цахъ заключе́нныхъ пита́тельнице: ра́дꙋйсѧ, тѣлесє́мъ на́шымъ здра́вїе и҆ дꙋша́мъ сп҃се́нїе.

Ра́дꙋйсѧ, ꙗ҆́кѡ ра́й пи́щный процвѣта́еши: ра́дꙋйсѧ, ꙗ҆́кѡ приста́нище дꙋша́мъ гото́виши.

Конда́къ д҃.

Бꙋ́рѧ проти́вныхъ вѣ́трѡвъ, є҆гда̀ на́йдетъ на ны̀ внеза́пнѡ, гро́мы и҆ мѡ́лнїи, гра́дъ и҆ вода̀ мно́гаѧ ᲂу҆стремѧ́тсѧ на зе́млю, тогда̀, гпⷭ҇жѐ всемлⷭ҇тиваѧ, ᲂу҆скорѝ на по́мощь на́мъ безпомѡ́щнымъ, защитѝ и҆ и҆зба́ви на́съ ѿ дожде́внагѡ лїѧ́нїѧ, є҆гѡ́же сотвори́хомсѧ досто́йни грѣ̑хъ ра́ди на́шихъ, и҆ да бꙋ́дꙋтъ полѧ̀ и҆ ни́вы невреди̑мы ѿ си́хъ, и҆ да не потопи́тъ на́съ бꙋ́рѧ водна́ѧ. Тебе́ бо грѣ́шнїи и҆́мамы застꙋ́пницꙋ непосты́днꙋю, на тѧ̀ ᲂу҆пова́нїе на́ше возлага́емъ, и҆ прославлѧ́юще си́лꙋ мл҃твъ твои́хъ, ро́ждшемꙋсѧ ѿ тебє̀ сп҃сꙋ мі́ра зове́мъ: А҆ллилꙋ́їа.

І҆́косъ д҃.

Слы́шаще и҆ ви́дѧще твоѐ сострада́нїе, влⷣчце, къ бѣ́дствꙋющымъ и҆ ги́бнꙋщымъ лю́демъ, мы̀ грѣ́шнїи прибѣга́емъ къ тебѣ̀ и҆ мо́лимсѧ: ѽ прест҃а́ѧ дв҃о, ᲂу҆слы́ши на́съ, и҆ во дни̑, є҆гда̀ со́лнце и҆зсꙋши́тъ зе́млю и҆ ѿ сꙋ́хости зно́й бꙋ́детъ, и҆ прозѧбє́нїѧ земна̑ѧ начнꙋ́тъ ᲂу҆вѧда́ти, тогда̀, влⷣчце, ро́сꙋ бл҃года́ти твоеѧ̀ низпослѝ на тре́бꙋющыѧ и҆ просѧ́щыѧ млⷭ҇ти, возвеселѝ лицѐ землѝ люде́й ра́ди твои́хъ, и҆ младе́нєцъ и҆́хъ, и҆ скотѡ́въ, и҆ и҆ны́хъ всѣ́хъ, и҆̀же ча́ютъ къ бг҃ꙋ да́ти пи́щꙋ и҆̀мъ во бл҃го вре́мѧ, и҆ ѿ ст҃ы́ѧ і҆кѡ́ны твоеѧ̀ спори́тельницы ꙗ҆вѝ млⷭ҇рдїе твоѐ вопїю́щымъ тебѣ̀ такова̑ѧ:

Ра́дꙋйсѧ, мл҃твеннице неꙋсыпа́ющаѧ ко хрⷭ҇тꙋ̀ бг҃ꙋ, на млⷭ҇ть къ на́мъ є҆го̀ преклонѧ́ющаѧ: ра́дꙋйсѧ, гнѣ́въ бж҃їй, на ны̀ пра́веднѡ дви́жимый, ѿ гла́въ на́шихъ ѿводѧ́щаѧ.

Ра́дꙋйсѧ, мт҃рнимъ покро́вомъ твои́мъ ѿ всѧ́кихъ несча́стїй на́съ ѡ҆хранѧ́ющаѧ: ра́дꙋйсѧ, полѧ̀ и҆ ни̑вы на́шѧ ѿ запале́нїѧ со́лнечнагѡ и҆ зно́ѧ спаса́ющаѧ.

Ра́дꙋйсѧ, всемлⷭ҇тиваѧ ᲂу҆слы́шательнице гласѡ́въ на́шихъ моле́бныхъ въ ско́рби и҆ ѡ҆бстоѧ́нїихъ: ра́дꙋйсѧ, жили̑ща на̑ша ѿ ѻ҆гнѧ̀ спаса́ющаѧ.

Ра́дꙋйсѧ, держа́внаѧ скоропомо́щнице на́ша во дни̑ тѧ́жкихъ и҆спыта́нїй: ра́дꙋйсѧ, ѿ всѣ́хъ бѣ́дъ ско́рое и҆збавле́нїе.

Конда́къ є҃.

Бг҃оте́чнаѧ ѕвѣзда̀ і҆кѡ́на твоѧ̀, бг҃омт҃и, лю́демъ, просѧ́щымъ хлѣ́ба насꙋ́щнагѡ, немерца́емѡ сїѧ́етъ. Покро́вомъ бо твоеѧ̀ млⷭ҇ти соблюда́еши полѧ̀ и҆ ни̑вы на́шѧ и҆ плодоноси́ти и҆̀хъ ᲂу҆строѧ́еши, подвиза́ющи вѣ̑рныѧ вопи́ти хрⷭ҇тꙋ̀ бг҃ꙋ: А҆ллилꙋ́їа.

І҆́косъ є҃.

Ви́дѧ тѧ̀ сн҃ъ тво́й при крⷭ҇тѣ̀ стоѧ́щꙋю съ возлю́бленнымъ ᲂу҆ч҃нко́мъ, глаго́летъ тебѣ̀: же́но, сѐ сы́нъ тво́й. И҆ ᲂу҆ч҃нкꙋ̀: сѐ мт҃и твоѧ̀: всыновлѧ́ѧ тебѣ̀ всѧ̑ вѣ́рꙋющыѧ въ него̀. Мы́ же ча̑да твоѧ̑ сꙋ́ще, на тво́й покро́въ надѣ́ющесѧ, тебѣ̀, ꙗ҆́кѡ мт҃ри на́шей, глаго́лати дерза́емъ:

Ра́дꙋйсѧ, сꙋдїѝ првⷣнагѡ ᲂу҆моле́нїе: ра́дꙋйсѧ, грѣхѡ́въ на́шихъ проще́нїе.

Ра́дꙋйсѧ, наде́ждо на́ша и҆звѣ́стнаѧ: ра́дꙋйсѧ, ᲂу҆пова́нїе на́ше непосты́дное.

Ра́дꙋйсѧ, скорбе́й на́шихъ разрѣше́нїе: ра́дꙋйсѧ, печа́лей на́шихъ ᲂу҆толе́нїе.

Ра́дꙋйсѧ, пла́мене страсте́й и҆змѣнѧ́ющаѧ: ра́дꙋйсѧ, всѣ́хъ родѡ́въ весе́лїе.

Конда́къ ѕ҃.

Проповѣ́дꙋетъ цр҃ковь хрⷭ҇то́ва чꙋдеса̀ твоѧ̑, бг҃ороди́тельнице, ѿ востѡ́къ бо до за̑падъ хва́льно и҆́мѧ твоѐ, и҆ нѣ́сть гра́да и҆лѝ страны̀, и҆дѣ́же не ꙗ҆ви́шасѧ тобо́ю дѣ̑йства си́лы бж҃їѧ, во и҆збавле́нїе и҆ сп҃се́нїе, просвѣще́нїе и҆ и҆сцѣле́нїе люде́й хрⷭ҇тоимени́тыхъ, наипа́че же чрез̾ і҆кѡ̑ны твоѧ̑ ст҃ы̑ѧ ѡ҆бы́кла є҆сѝ чꙋдотвори́ти, и҆злива́ющи ѿ ни́хъ стрꙋи̑ млⷭ҇тей и҆ щедро́тъ бѣ́дствꙋющемꙋ и҆ тре́бꙋющемꙋ по́мощи человѣ́чествꙋ. Сегѡ̀ ра́ди славосло́вѧще тѧ̀, сн҃ꙋ твоемꙋ̀ и҆ бг҃ꙋ на́шемꙋ вопїе́мъ: А҆ллилꙋ́їа.

І҆́косъ ѕ҃.

Возсїѧ́ла є҆сѝ ѿ и҆́стиннагѡ со́лнца зарѧ̀, дв҃о бг҃оѻтрокови́це, просвѣща́ющи дꙋ́шы всѣ́хъ томи́мыхъ гла́домъ дꙋше́внымъ, рече́ бо гдⷭ҇ь: не ѡ҆ хлѣ́бѣ є҆ди́нѣмъ жи́въ бꙋ́детъ человѣ́къ, но ѡ҆ всѧ́комъ глаго́лѣ, и҆сходѧ́щемъ и҆з̾ ᲂу҆́стъ бж҃їихъ. Ѻ҆ба́че помрачи́шасѧ ѻ҆́чи на́ши и҆ ѡ҆каменѣ́ша сердца̀ на̑ша, и҆ не ви́димъ ѻ҆чи́ма свои́ма и҆ не разꙋмѣ́емъ се́рдцемъ сꙋде́бъ бж҃їихъ. Томи́мїи же дꙋше́внымъ гла́домъ къ тебѣ̀ прибѣга́емъ, пречⷭ҇таѧ дв҃о, и҆ про́симъ сло́вомъ жи́зни ᲂу҆толи́ти гла́дъ дꙋше́вный на́съ, вопїю́щихъ тебѣ̀ такова̑ѧ:

Ра́дꙋйсѧ, ѿ ᲂу҆бо́жества дꙋше́внагѡ на́съ воздвиза́ющаѧ: ра́дꙋйсѧ, пита́ющаѧ на́съ сло́вомъ жи́зни.

Ра́дꙋйсѧ, трапе́зо пресвѣ́тлаѧ, хлѣ́бъ жи́зни носи́вшаѧ: ра́дꙋйсѧ, пи́ще, ма́нны прїе́мнице.

Ра́дꙋйсѧ, землѐ бл҃га́ѧ, кла́съ бжⷭ҇твенный и҆зрасти́вшаѧ: ра́дꙋйсѧ, ни́во, растѧ́щаѧ многопло́дїе щедро́тъ.

Ра́дꙋйсѧ, ка́меню, напои́вшїй жа́ждꙋщыѧ жи́зни: ра́дꙋйсѧ, млⷭ҇ть сꙋгꙋ́бѡ на́мъ подаю́щаѧ.

Конда́къ з҃.

Хотѧ́щи жа́ти сп҃се́нїе, ꙗ҆́кѡ село̀ сла́дкое показа́ласѧ є҆сѝ, влⷣчце, ѿ негѡ́же пита́ющесѧ, и҆́мамы пи́щꙋ вѣ́чнꙋю и҆ нетлѣ́ннꙋю. Мы́ же земні́и сꙋ́ще, мо́лимъ тѧ̀, пречⷭ҇таѧ дв҃о: покажѝ си́лꙋ твою̀ въ дни̑ жа́твы ни́въ и҆ поле́й на́шихъ, да всѧ́къ ѕла́къ и҆з̾ѡби́лꙋетъ на ᲂу҆тѣше́нїе на́съ, пою́щихъ бг҃ꙋ: А҆ллилꙋ́їа.

І҆́косъ з҃.

Ди́внѡ просла́виласѧ є҆сѝ, бг҃омт҃и, въ защище́нїи люде́й правосла́вныхъ. Возстаю́щїи на бг҃а не познаю́тъ, ко́ль сильна̀ є҆́сть мл҃тва бж҃їѧ мт҃ре. Мы́ же ѡ҆ твое́мъ всемо́щнѣмъ застꙋпле́нїи, по́мощи и҆ бл҃гослове́нїи до́брѣ вѣ́дꙋще, си́це къ тебѣ̀ со ᲂу҆миле́нїемъ зове́мъ:

Ра́дꙋйсѧ, чи́стыхъ рꙋка́ма и҆ се́рдцемъ земледѣ́льцєвъ бл҃гослове́нными плода́ми вѣнча́ющаѧ: ра́дꙋйсѧ, бѣ́дствꙋющымъ средѝ напа́стей и҆ трꙋдѡ́въ внеза́пное вспоможе́нїе.

Ра́дꙋйсѧ, безма́тернихъ сиро́тъ незри́маѧ воспита́тельнице: ра́дꙋйсѧ, помо́щнице всѣ́хъ безпомо́щныхъ.

Ра́дꙋйсѧ, корми́тельнице вдѡ́въ и҆ сиро́тъ: ра́дꙋйсѧ, подаю́щаѧ си́лꙋ, пи́щꙋ и҆ ѿра́дꙋ болѧ́щымъ и҆ разсла́блєннымъ.

Ра́дꙋйсѧ, ѻ҆де́ждо наги́хъ дерзнове́нїѧ: ра́дꙋйсѧ, мно́гихъ согрѣше́нїй проще́нїе.

Конда́къ и҃.

Ꙗ҆́коже дре́вле содѣ́йствовала є҆сѝ схожде́нїю на зе́млю сп҃си́телѧ мі́ра, си́це и҆ ны́нѣ, ꙗ҆́кѡ со́лнце свѣтоза́рное, восхо́диши над̾ созрѣва́ющею ни́вою, предше́ствꙋющи прихо́дꙋ гдⷭ҇и́на съ жа́тельми. Томꙋ̀ и҆ мы̀ со стра́хомъ вопїе́мъ: А҆ллилꙋ́їа.

І҆́косъ и҃.

Всѐ ᲂу҆пова́нїе на́ше на тѧ̀ возлага́емъ, мт҃и бж҃їѧ, и҆ въ ско́рбехъ на́шихъ ко ст҃ѣ́й і҆кѡ́нѣ твое́й ᲂу҆се́рднѡ притека́емъ, ча́юще полꙋчи́ти ѿ тебє̀ ᲂу҆тѣше́нїе бл҃года́тное и҆ вспоможе́нїе во ѡ҆скꙋдѣ́нїи и҆ нищетѣ̀ на́шей, сегѡ̀ ра́ди взыва́емъ тѝ:

Ра́дꙋйсѧ, млⷭ҇ти превели́кїѧ сокро́вище: ра́дꙋйсѧ, пи́ще и҆ ᲂу҆тѣше́нїе къ тебѣ̀ прибѣга́ющихъ.

Ра́дꙋйсѧ, хлѣ́бе неснѣда́емый а҆́лчꙋщихъ: ра́дꙋйсѧ, ско́рое ни́щихъ ᲂу҆слы́шанїе.

Ра́дꙋйсѧ, ѿ гла́да и҆ нꙋ́жды скорбѧ́щихъ прїѧ́тное попече́нїе: ра́дꙋйсѧ, къ свѣ́тꙋ непристꙋ́пномꙋ на́съ и҆зводѧ́щаѧ.

Ра́дꙋйсѧ, ключꙋ̀ црⷭ҇твїѧ хрⷭ҇то́ва: ра́дꙋйсѧ, наде́ждо бла̑гъ вѣ́чныхъ.

Конда́къ ѳ҃.

Всѝ лю́дїе дивѧ́тсѧ вели́чїю чꙋде́съ твои́хъ, прест҃а́ѧ дв҃о, и҆злива́емыхъ тобо́ю ѿ ст҃ы́хъ твои́хъ і҆кѡ́нъ, ꙗ҆́кѡ всѣ̑мъ да́рꙋеши по коегѡ́ждо проше́нїю, ᲂу҆строѧ́еши до́мы на́шѧ, посыла́еши бл҃гослове́нїе землѝ дѣ́лателємъ и҆ дае́ши лю́демъ всѧ́кое дово́льство. Тѣ́мже вопїе́мъ сн҃ꙋ твоемꙋ̀: А҆ллилꙋ́їа.

І҆́косъ ѳ҃.

Вѣті̑и многовѣща́ннїи не мо́гꙋтъ воспѣ́ти чꙋде́съ твои́хъ, бг҃омт҃и влⷣчце, ꙗ҆́кѡ всѣ̑мъ концє́мъ землѝ простира́еши рꙋ́кꙋ по́мощи и҆ низпосыла́еши вѣ̑рнымъ землѝ плодоно́сїе, бл҃горастворе́нїе воздꙋ́хѡвъ и҆ всѧ́кое и҆з̾ѻби́лїе плодѡ́въ и҆ бла̑гъ земны́хъ. Мы́ же во смире́нїи свое́мъ и҆сповѣ́дающе твоѐ вели́кое застꙋпле́нїе на́съ грѣ́шныхъ и҆ непреста́ннꙋю по́мощь въ нꙋ́ждахъ на́шихъ, вопїе́мъ тѝ:

Ра́дꙋйсѧ, досто́йнѡ восхвалѧ́емаѧ ѿ а҆рха̑гг҃лъ и҆ а҆́гг҃лъ: ра́дꙋйсѧ, велича́емаѧ ѿ всѣ́хъ нбⷭ҇ныхъ си́лъ.

Ра́дꙋйсѧ, чтⷭ҇нѣ́йшаѧ херꙋві̑мъ: ра́дꙋйсѧ, сла́внѣйшаѧ без̾ сравне́нїѧ серафі̑мъ.

Ра́дꙋйсѧ, влⷣчце нб҃а и҆ землѝ: ра́дꙋйсѧ, роди́тельнице вѣ́чнагѡ цр҃ѧ̀.

Ра́дꙋйсѧ, вѣ́рнаѧ рабо̀ гдⷭ҇нѧ: ра́дꙋйсѧ, ᲂу҆бл҃жа́емаѧ на нб҃сѝ и҆ на землѝ.

Конда́къ і҃.

Сп҃си́тельное прибѣ́жище въ ско́рбехъ и҆ напа́стехъ ты̀ є҆сѝ, бцⷣе: тѣ́мже и҆спросѝ ᲂу҆ сн҃а твоегѡ̀ и҆ бг҃а на́шегѡ млⷭ҇ти на́мъ грѣ̑шнымъ, пою́щымъ: А҆ллилꙋ́їа.

І҆́косъ і҃.

Стѣна̀ є҆сѝ похвалѧ́ющымъ чꙋдеса̀ твоѧ̑, бцⷣе дв҃о, и҆ всѣ̑мъ съ вѣ́рою притека́ющымъ и҆ покланѧ́ющымсѧ тебѣ̀ и҆ і҆кѡ́нѣ твое́й, спори́тельница хлѣбѡ́въ и҆менꙋ́емой, и҆ глаго́лющымъ:

Ра́дꙋйсѧ, неистощи́мый и҆сто́чниче млⷭ҇тей и҆ щедро́тъ: ра́дꙋйсѧ, любвѐ бжⷭ҇твенныѧ проѧвле́нїе.

Ра́дꙋйсѧ, чꙋде́съ пресла́вныхъ соверше́нїе: ра́дꙋйсѧ, трꙋжда́ющихсѧ и҆ ѡ҆бремене́нныхъ сла́дкїй поко́ю.

Ра́дꙋйсѧ, терпѣли́выхъ страда́льцєвъ да̑ры бл҃года́тными ᲂу҆щедрѧ́ющаѧ: ра́дꙋйсѧ, ѡ҆ хра́мѣхъ бж҃їихъ попече́нїе и҆мꙋ́щихъ дх҃о́вною ра́достїю ᲂу҆тѣша́ющаѧ.

Ра́дꙋйсѧ, несꙋмнѣ́ннаѧ на́ша наде́ждо: ра́дꙋйсѧ, ти́хое и҆ до́брое приста́нище.

Конда́къ а҃і.

Пѣ́нїе на́ше не пре́зри, прест҃а́ѧ дв҃о, и҆ сокро́вище любвѐ твоеѧ̀ не затворѝ ѿ на́съ: ще́дрꙋю рꙋ́кꙋ твоеѧ̀ по́мощи прострѝ на́мъ, да прославлѧ́юще млⷭ҇ти и҆ чꙋдеса̀ твоѧ̑, пое́мъ трїеди́номꙋ бг҃ꙋ: А҆ллилꙋ́їа.

І҆́косъ а҃і.

Свѣ́тлыми лꙋча́ми чꙋде́съ твои́хъ просвѣща́еши ве́сь мі́ръ хрⷭ҇тїа́нскїй и҆ застꙋпа́еши лю́ди правосла̑вныѧ, и҆скꙋплє́нныѧ кро́вїю сн҃а твоегѡ̀. Тѣ́мже припа́дающе ко ст҃о́мꙋ ѻ҆́бразꙋ твоемꙋ̀, на не́мже зри́мъ тѧ̀, бг҃омт҃и, на воздꙋ́сѣ над̾ полѧ́ми и҆ ни́вами на́шими, бл҃гословлѧ́ющꙋю сѡ́бранныѧ снопы̀ хлѣ́ба, мо́лимъ тѧ̀, всемлⷭ҇тиваѧ влⷣчце: ро́дъ человѣ́ческїй, ѡ҆сꙋжде́нный въ по́тѣ лица̀ своегѡ̀ снѣ́сти хлѣ́бъ, въ болѣ́знехъ роди́ти и҆ въ печа́лехъ пита́ти ча̑да своѧ̑, млⷭ҇тивнѡ пощадѝ и҆ застꙋпѝ. Да́рꙋй на́мъ здра́вїе и҆ бл҃гомо́щїе, да пита́емїи тобо́ю, ѿ си́лы въ си́лꙋ возраста́ти бꙋ́демъ и҆ всѝ и҆спо́лнимсѧ ра́дости и҆ ᲂу҆тѣше́нїѧ ѿ щедрода́тельныѧ десни́цы любвѐ твоеѧ̀, зовꙋ́ще тебѣ̀:

Ра́дꙋйсѧ, младе́нцєвъ млекопита́тельнице: ра́дꙋйсѧ, ᲂу҆сты̀ дѣте́й хвалꙋ̀ бг҃ови соверша́ющаѧ.

Ра́дꙋйсѧ, росо̀ нб҃ото́чнаѧ въ зно́и трꙋдѡ́въ сꙋ́щымъ: ра́дꙋйсѧ, подаю́щаѧ тре́бꙋющымъ бл҃гострое́нїе.

Ра́дꙋйсѧ, просѧ́щымъ и҆з̾ѻби́лїе ᲂу҆готовлѧ́ющаѧ: ра́дꙋйсѧ, мно́гажды прошє́нїѧ предварѧ́ющаѧ.

Ра́дꙋйсѧ, печа́льныхъ ᲂу҆тѣше́нїе: ра́дꙋйсѧ, скорбѧ́щихъ весе́лїе.

Конда́къ в҃і.

Бл҃года́тнꙋю по́мощь низпослѝ на́мъ, мт҃и бж҃їѧ, и҆ є҆гда̀ и҆зы́детъ сѣ́ѧй сѣ́ѧти, да не падꙋ́тъ сѣ́мена при пꙋтѝ, и҆лѝ посредѣ̀ те́рнїѧ, и҆лѝ на ка́мени, но на землѝ до́брѣй. Сотворѝ восхо́дъ и҆́хъ, да произрасти́тъ землѧ̀ пло́дъ стори́цею, и҆ мы̀ всѝ въ ра́дости се́рдца бл҃года́рными ᲂу҆сты̀ вопїе́мъ бг҃ꙋ: А҆ллилꙋ́їа.

І҆́косъ в҃і.

Пою́ще чꙋдеса̀ твоѧ̑ и҆ млⷭ҇ти, влⷣчце бцⷣе, хва́лимъ тѧ̀ всѝ, ꙗ҆́кѡ вои́стиннꙋ є҆сѝ на́ша помо́щница, застꙋ́пница, пита́тельница и҆ домострои́тельница, житїѐ на́ше ко сп҃се́нїю ᲂу҆строѧ́ющаѧ. Тѣ́мже вопїе́мъ тѝ:

Ра́дꙋйсѧ, бога́тство нетлѣ́нное на́мъ подава́ющаѧ: ра́дꙋйсѧ, бра́шно неги́блющее а҆́лчꙋщымъ пра́вды.

Ра́дꙋйсѧ, питїѐ неисчерпа́емое жа́ждꙋщымъ жи́зни: ра́дꙋйсѧ, землѐ ѡ҆бѣтова́нїѧ, и҆з̾ неѧ́же тече́тъ ме́дъ и҆ млеко̀.

Ра́дꙋйсѧ, вѣ́рныхъ сп҃си́тельное прибѣ́жище: ра́дꙋйсѧ, покро́ве мі́рꙋ, ши́ршїй ѻ҆́блака.

Ра́дꙋйсѧ, ненаде́жныхъ надѣ́ѧнїе: ра́дꙋйсѧ, ѿча́ѧнныхъ сп҃се́нїе.

Конда́къ г҃і.

Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во! Ны́нѣшнее на́ше прїе́мши приноше́нїе, и҆зба́ви лю́ди, къ тебѣ̀ прибѣга́ющыѧ, ѿ всѧ́кїѧ нꙋ́жды, гла́да дꙋше́внагѡ и҆ тѣле́снагѡ, смертоно́сныхъ болѣ́зней и҆ всѧ́кагѡ ѕла̀ и҆ вѣ́чныѧ и҆змѝ мꙋ́ки, да съ ли̑ки а҆́гг҃льскими непреста́ннѡ пое́мъ бг҃ꙋ: А҆ллилꙋ́їа.

Се́й конда́къ глаго́летсѧ три́жды. И҆ па́ки чте́тсѧ і҆́косъ а҃-й, и҆ конда́къ а҃-й.

І҆́косъ а҃.

Ра́дꙋйсѧ, хрⷭ҇толюби̑выѧ лю́ди ѿ всѧ́кихъ бѣ́дъ сп҃са́ющаѧ: ра́дꙋйсѧ, а҆́лчꙋщихъ пита́ющаѧ.

Ра́дꙋйсѧ, си́рыхъ застꙋпле́нїе: ра́дꙋйсѧ, наги́хъ ѡ҆дѣѧ́нїе.

Ра́дꙋйсѧ, и҆зрасти́вшаѧ на́мъ пло́дъ живота̀: ра́дꙋйсѧ, ро́ждшаѧ сп҃са дꙋ́шъ на́шихъ.

Конда́къ а҃.

Мл҃тва.

Ѽ прест҃а́ѧ дв҃о бцⷣе, премлⷭ҇тиваѧ влⷣчце, цр҃и́це нб҃сѐ и҆ землѝ, всѧ́кагѡ до́ма и҆ семе́йства хрⷭ҇тїа́нскагѡ бл҃гоꙋстрои́тельнице, трꙋжда́ющихсѧ бл҃гослове́нїе, нꙋжда́ющихсѧ неистощи́мое бога́тство, си́рыхъ и҆ вдови́цъ и҆ всѣ́хъ люде́й корми́тельнице! Пита́тельнице на́ша, ро́ждшаѧ пита́телѧ вселе́нныѧ, и҆ спори́тельнице хлѣбѡ́въ на́шихъ, ты̀, влⷣчце, низпосыла́еши твоѐ мт҃рнее бл҃гослове́нїе градѡ́мъ на́шымъ, се́ламъ и҆ ни́вамъ и҆ коемꙋ́ждо до́мꙋ, на тѧ̀ ᲂу҆пова́нїе и҆мꙋ́щемꙋ. Тѣ́мже съ бл҃гоговѣ́йнымъ тре́петомъ и҆ сокрꙋше́ннымъ се́рдцемъ смире́ннѡ мо́лимъ тѧ̀: бꙋ́ди и҆ на́мъ, грѣ̑шнымъ и҆ недостѡ́йнымъ рабѡ́мъ твои̑мъ, мꙋ́драѧ домострои́тельница, житїѐ на́ше до́брѣ ᲂу҆строѧ́ющаѧ. Всѣ́хъ же прибѣга́ющихъ къ покро́вꙋ твоемꙋ̀, всѧ́кїй до́мъ и҆ семе́йство во бл҃гоче́стїи и҆ правосла́вїи, є҆диномы́слїи, послꙋша́нїи и҆ дово́льствѣ соблюдѝ. Ни́щыѧ и҆ неимꙋ́щыѧ пропита́й, ста́рость поддержѝ, младе́нцы воспита́й, всѣ́хъ вразꙋмѝ преи́скреннѣ взыва́ти ко гдⷭ҇ꙋ: хлѣ́бъ на́шъ насꙋ́щный да́ждь на́мъ дне́сь. Сохранѝ, пречⷭ҇таѧ мт҃и, лю́ди твоѧ̑ ѿ всѧ́кїѧ нꙋ́жды, болѣ́зни, гла́да, ѻ҆гнѧ̀, ѿ всѧ́кагѡ ѕла́гѡ ѡ҆бстоѧ́нїѧ и҆ всѧ́кагѡ нестрое́нїѧ. Ѻ҆би́тели [и҆лѝ: ве́си] на́шей [и҆лѝ: гра́дꙋ на́шемꙋ], домѡ́мъ и҆ семе́йствѡмъ, и҆ всѧ́кой дꙋшѝ хрⷭ҇тїа́нской, и҆ все́й странѣ̀ на́шей и҆схода́тайствꙋй ми́ръ и҆ ве́лїю млⷭ҇ть, да сла́вимъ тѧ̀, премлⷭ҇тивꙋю пита́тельницꙋ и҆ спори́тельницꙋ на́шꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

История иконы гласит о том, что написана она была по благословению Амвросия Оптинского

История иконы довольно необычна. Предание гласит, что написана она была по благословению самого Амвросия Оптинского в 1890 году. Считается, что идея написать этот образ появилась у него в последние годы его жизни. Так как он был сильно обеспокоен судьбой Шамординской женской обители, он часто молился Богоматери о покровительстве и заступничестве данного места.

Икона Спорительница Хлебов была написана по благословению Амвросия Оптинского. Фото: fotopaterik.org

В эскиз данной иконы лег пейзаж от окрестностей монастыря. Над ним он решил изобразить парящую в воздухе Богоматерь. Таким образом, он показал, что монастырь находится под покровительством Божией Матери.

В 1890 году Амвросий попросил написать икону иеромонаху Даниилу. Это был родной брат шамординской игумении Софии. Даниил тогда был довольно известным академическим живописцем. Иеромонах изобразил Богоматерь, сидящую на облаках с распростертыми руками. Он изобразил ее в своем привычном академическом стиле. Данный образ был взят с иконы «Всех святых» из монастыря в Орловской губернии. На нижней же части иконы изобразили пейзаж с уходящим вдаль хлебным полем.

Такая икона и стала довольно близкой к тому образу, что представлял старец Амвросий. Когда икона была написана, ее отправили в Оптину Пустынь. Привезла ее игуменья Илария из Болховского женского монастыря, где она и была написана. Ее почитание началось сразу.