Акафист Пресвятой Богородице пред иконой «Одигитрия» Смоленская

А҆ка́ѳїстъ прест҃ѣ́й бцⷣѣ пред̾ і҆кѡ́ною ѻ҆дїги́трїа.

Конда́къ а҃.

И҆збра́ннѣй ѿ всѣ́хъ родѡ́въ, нб҃сѝ и҆ землѝ цр҃и́цѣ, прест҃ѣ́й бцⷣѣ ѻ҆дїги́трїи, ꙗ҆́кѡ и҆зба́вльшесѧ ѿ вѣ́чныѧ сме́рти блгⷣтїю ѿ тебє̀ ро́ждшагосѧ хрⷭ҇та̀ бг҃а на́шегѡ и҆ твои́мъ мт҃рнимъ пред̾ ни́мъ хода́тайствомъ, бл҃года́рственное пѣ́нїе прино́симъ тѝ, рабѝ твоѝ. Ты́ же, всемлⷭ҇тиваѧ на́ша застꙋ́пнице, ѿ всѧ́кихъ на́съ бѣ́дъ и҆ ско́рбныхъ ѡ҆бстоѧ́нїй свобожда́й и҆ къ црⷭ҇твїю го́рнемꙋ пꙋтево́дствꙋй, да зове́мъ тѝ:

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

І҆́косъ а҃.

А҆рха́гг҃льскїй гла́съ вопїе́мъ тѝ, чⷭ҇таѧ: ра́дꙋйсѧ, блгⷣтнаѧ ѻ҆дїги́трїе мр҃і́е, и҆ ра́дости дꙋхо́вныѧ и҆спо́лни на́съ, да бл҃гоговѣ́йною дꙋше́ю и҆ чи́стымъ се́рдцемъ принесе́мъ тѝ, ро́ждшей мі́рꙋ спⷭ҇телѧ хрⷭ҇та̀ бг҃а на́шегѡ, глаго́лы сїѧ̀:

Ра́дꙋйсѧ, бг҃а ѻ҆ц҃а̀ бл҃говоле́нїемъ ѡ҆сѣне́ннаѧ: ра́дꙋйсѧ, бг҃а сн҃а мт҃и неискꙋсобра́чнаѧ.

Ра́дꙋйсѧ, бг҃а дх҃а ст҃а́гѡ ѻ҆би́тель сщ҃е́ннаѧ: ра́дꙋйсѧ, трⷪ҇ческїѧ та́йны проѧвле́нїе.

Ра́дꙋйсѧ, а҆́гг҃льскихъ ᲂу҆мѡ́въ ᲂу҆дивле́нїе: ра́дꙋйсѧ, чл҃вѣ́ческагѡ ро́да ᲂу҆краше́нїе.

Ра́дꙋйсѧ, го́рнѧѧ съ до́льними совокꙋпи́вшаѧ: ра́дꙋйсѧ, врата̀ ра́йскїѧ земнорѡ́днымъ ѿве́рзшаѧ.

Ра́дꙋйсѧ, лѣ́ствице нбⷭ҇наѧ: ра́дꙋйсѧ, ста́мно бг҃опрїи́мнаѧ.

Ра́дꙋйсѧ, кꙋпино̀ неѡпали́маѧ: ра́дꙋйсѧ, трапе́зо прест҃а́ѧ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ в҃.

Ви́дѣвъ і҆кѡ́нꙋ прест҃а́гѡ твоегѡ̀ ли́ка, бцⷣе дв҃о, ю҆́же всехва́льный є҆ѵⷢ҇лі́стъ лꙋка̀ написа̀, рекла̀ є҆сѝ ѡ҆ не́й пречⷭ҇тыми ᲂу҆сты̑ твои́ми: съ се́ю і҆кѡ́ною блгⷣть моѧ̀ и҆ си́ла. Таково́е ѡ҆бѣтова́нїе твоѐ ᲂу҆вѣ́дѣвше, бл҃гоговѣ́йнѡ почита́емъ прест҃ы́й ѻ҆́бразъ тво́й, влⷣчце, и҆ воспѣва́емъ сн҃ꙋ твоемꙋ̀ и҆ бг҃ꙋ: А҆ллилꙋ́їа.

І҆́косъ в҃.

Оу҆разꙋмѣ́въ бл҃говоле́нїе твоѐ, бцⷣе, къ се́й і҆кѡ́нѣ твое́й, сла́вный а҆пⷭ҇лъ лꙋка̀ дарова̀ ю҆̀ въ бл҃гослове́нїе и҆ ѡ҆сщ҃е́нїе хрⷭ҇то́вой цр҃кви а҆нтїохі́йстѣй, въ не́й же пꙋтеводи́тельницей ѻ҆на̀ наименова́сѧ и҆ чꙋдесы̀ бжⷭ҇твенными просла́висѧ. Ѡ҆ се́мъ бл҃годарѧ́ще тѧ̀, гпⷭ҇жѐ всебл҃га́ѧ, ꙗ҆́кѡ подо́бїе пречⷭ҇тагѡ ли́ка твоегѡ̀ во ᲂу҆тѣше́нїе на́мъ ѡ҆ста́вила є҆сѝ, ᲂу҆се́рднѡ тебѣ̀ вопїе́мъ:

Ра́дꙋйсѧ, цр҃и́це го́рнихъ и҆ до́льнихъ: ра́дꙋйсѧ, влⷣчце а҆́гг҃лѡвъ и҆ чл҃вѣ́кѡвъ.

Ра́дꙋйсѧ, мі́ра ᲂу҆мире́нїе: ра́дꙋйсѧ, дре́внїѧ вражды̀ разрꙋше́нїе.

Ра́дꙋйсѧ, дѣ́вства сто́лпе: ра́дꙋйсѧ, смире́нїѧ глꙋбино̀.

Ра́дꙋйсѧ, ѡ҆блаче́ннаѧ въ со́лнцѣ: ра́дꙋйсѧ, сїѧ́ющаѧ бжⷭ҇твенною сла́вою.

Ра́дꙋйсѧ, мт҃и свѣ́та невече́рнѧгѡ: ра́дꙋйсѧ, раю̀ сла́дости нбⷭ҇ныѧ.

Ра́дꙋйсѧ, вертогра́дѣ хрⷭ҇то́въ бл҃гоꙋха́нный: ра́дꙋйсѧ, ѻ҆́дре цр҃ѧ̀ вели́кагѡ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ г҃.

Си́лою бж҃їею чꙋдеса̀ преди́вныѧ соверша́хꙋсѧ ѿ і҆кѡ́ны твоеѧ̀, бг҃ома́ти влⷣчце, є҆гда̀ принесе́на бы́сть въ царьгра́дъ и҆ въ пресла́внѣмъ влахе́рнстѣмъ хра́мѣ поста́влена: слѣпы̑ѧ просвѣща́ше, всѧ́къ недꙋ́гъ въ лю́дѣхъ врачева́ше блгⷣтїю твое́ю, бцⷣе, да всѝ зове́мъ просла́вльшемꙋ тѧ̀ бг҃ꙋ: А҆ллилꙋ́їа.

І҆́косъ г҃.

И҆мѣ́ѧше тѧ̀ царьгра́дъ застꙋ́пницꙋ держа́внꙋю, бцⷣе дв҃о, и҆ во днѝ нападе́нїѧ на негѡ̀ врагѡ́въ си́льныхъ и҆ бранеискꙋ́сныхъ, по́мощь твою̀ многочꙋ́днꙋю ѿ ст҃ы́ѧ і҆кѡ́ны твоеѧ̀ ѻ҆дїги́трїи полꙋча́ше. Тѣ́мже мо́лимсѧ тебѣ̀, всебл҃га́ѧ, ꙗ҆́коже дре́влѣ гра́дъ ѻ҆́ный мно́гажды ѿ поги́бели спасла̀ є҆сѝ, та́кѡ и҆ на́съ смире́нныхъ сп҃сѝ ѿ поги́бели вѣ́чныѧ мт҃рнимъ предста́тельствомъ твои́мъ ко хрⷭ҇тꙋ̀ бг҃ꙋ, да бл҃года́рнѡ зове́мъ тѝ:

Ра́дꙋйсѧ, царьгра́да крѣ́пкое ѡ҆гражде́нїе: ра́дꙋйсѧ, влахе́рнскагѡ хра́ма блгⷣтное сокро́вище.

Ра́дꙋйсѧ, нечести́выхъ ра́тей ѡ҆доле́нїе: ра́дꙋйсѧ, врагѡ́въ правосла́вїѧ посрамле́нїе.

Ра́дꙋйсѧ, ча́дъ хрⷭ҇то́выхъ предводи́тельнице къ побѣ́дамъ: ра́дꙋйсѧ, помо́щнице ско́раѧ въ бѣда́хъ къ тебѣ̀ притека́ющихъ.

Ра́дꙋйсѧ, застꙋ́пнице ᲂу҆се́рднаѧ моли́твеннѡ тѧ̀ призыва́ющихъ: ра́дꙋйсѧ, бг҃омꙋ́дрыхъ ст҃и́телей споспѣ́шнице во бл҃говѣ́стїи хрⷭ҇то́вомъ.

Ра́дꙋйсѧ, похвало̀ же́нъ и҆ дѣ́въ сла́во: ра́дꙋйсѧ, сто́лпе ѻ҆́гненный, зно́й страсте́й ᲂу҆мѣрѧ́ющїй.

Ра́дꙋйсѧ, сто́лпе ѻ҆́блачный, мра́къ грѣхѡ́въ разгонѧ́ющїй: ра́дꙋйсѧ, мр҃і́е, мт҃и хрⷭ҇та̀ бг҃а на́шегѡ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ д҃.

Бꙋ́рею морско́ю корабли̑ прего́рдагѡ кага́на, гра́дъ тво́й плѣни́ти восхотѣ́вшагѡ, сокрꙋши́ла є҆сѝ, влⷣчце, и҆ побѣ́дꙋ над̾ ни́мъ лю́демъ хрⷭ҇тоимени́тымъ дарова́ла є҆сѝ ѿ ст҃ы́ѧ і҆кѡ́ны твоеѧ̀ ѻ҆дїги́трїи, лꙋчѝ свѣ́та нбⷭ҇нагѡ и҆спꙋска́ѧ и҆ во́и правосла́вныѧ и҆́ми просвѣща́ѧ, да всѝ ᲂу҆вѣ́дѧтъ, ꙗ҆́кѡ ты̀ є҆сѝ вои́стиннꙋ воево́да держа́внаѧ царьгра́да и҆ просла́вѧтъ млⷭ҇ти твоѧ̑ и҆ чꙋдеса̀, воспѣва́ѧ сп҃си́телю бг҃ꙋ: А҆ллилꙋ́їа.

І҆́косъ д҃.

Слы́шавше ѡ҆ чꙋдесѣ́хъ твои́хъ пресла́вныхъ, бцⷣе дв҃о, ꙗ҆̀же ѿ і҆кѡ́ны твоеѧ̀ ꙗ҆ви́ла є҆сѝ въ царьгра́дѣ, недоꙋмѣ́емъ, ка́кѡ і҆кѡ́на та̀, носи́маѧ по сто́гнамъ гра́да, си́лою бжⷭ҇твенною носи́вшими ю҆̀ ᲂу҆правлѧ́ше и҆ стѡпы̀ и҆̀хъ по во́лѣ твое́й направлѧ́ше; напра́ви ᲂу҆̀бѡ, влⷣчце, и҆ на̑ша стѡпы̀ на пꙋ́ть и҆сполне́нїѧ за́повѣдей хрⷭ҇то́выхъ, и҆ наꙋчѝ на́съ вѣ́рнѡ и҆сполнѧ́ти ст҃ꙋ́ю во́лю сн҃а твоегѡ̀ и҆ бг҃а, да тебѣ̀ вопїе́мъ си́це:

Ра́дꙋйсѧ, свѣщѐ неꙋгаси́маѧ: ра́дꙋйсѧ, ѕвѣздо̀ незаходи́маѧ.

Ра́дꙋйсѧ, сїѧ́ющаѧ свѣ́томъ бжⷭ҇твеннымъ: ра́дꙋйсѧ, просвѣща́ющаѧ блгⷣтїю дꙋ́ши вѣ́рныхъ.

Ра́дꙋйсѧ, мѵ́ра хрⷭ҇то́ва бл҃гоꙋха́нїе: ра́дꙋйсѧ, землѝ ѡ҆сщ҃е́нїе.

Ра́дꙋйсѧ, ча́ше, че́рплющаѧ ра́дость всемꙋ̀ мі́рꙋ: ра́дꙋйсѧ, и҆сто́чниче, и҆злива́ющїй вѣ́чнꙋю сла́дость.

Ра́дꙋйсѧ, черто́же бл҃гоꙋкраше́нный цр҃ѧ̀ царе́й: ра́дꙋйсѧ, раѧ̀ краснѣ́йшаѧ.

Ра́дꙋйсѧ, ᲂу҆́тра свѣтлѣ́йшаѧ: ра́дꙋйсѧ, рꙋ́чко всезлата́ѧ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ є҃.

Ꙗ҆́кѡ бг҃оте́чнаѧ ѕвѣзда̀, і҆кѡ́на твоѧ̀, бг҃ома́ти влⷣчце, бл҃говоле́нїемъ твои́мъ ѿ царьгра́да въ странꙋ̀ рѡссі́йскꙋю принесе́сѧ, и҆ гра́дꙋ смоле́нскꙋ въ наслѣ́дїе блгⷣтное дарова́сѧ, тѣ́мже бл҃годари́мъ тѧ̀, ѽ гпⷭ҇жѐ всемлⷭ҇тиваѧ, ꙗ҆́кѡ таковы́й да́ръ ст҃ы́й ѻ҆те́чествꙋ на́шемꙋ дарова́ла є҆сѝ, и҆ пое́мъ въ трⷪ҇цѣ сла́вимомꙋ бг҃ꙋ: А҆ллилꙋ́їа.

І҆́косъ є҃.

Ви́дѣвше пресла́вное застꙋпле́нїе твоѐ гра́да смоле́нска, пречⷭ҇таѧ влⷣчце, прославлѧ́емъ вели́кꙋю твою̀ млⷭ҇ть, є҆́юже гра́дъ се́й ѿ разоре́нїѧ баты́ева чꙋде́снѡ сп҃сла̀ є҆сѝ, гла́сомъ бжⷭ҇твеннымъ ѿ і҆кѡ́ны твоеѧ̀ и҆сше́дшимъ, ᲂу҆го́дника хрⷭ҇то́ва меркꙋ́рїа на є҆динобо́рство съ предводи́телемъ ра́ти баты́евой посла́въ: є҆го́же ѻ҆́нъ мече́мъ свои́мъ поразѝ и҆ гра́дъ тво́й ѿ запале́нїѧ ѻ҆́гненнагѡ и҆зба́ви. Самаго́ же є҆го̀ вѣнце́мъ мч҃ническимъ ᲂу҆вѣнча́ла є҆сѝ, тогѡ̀ моли́твами нбⷭ҇ными сподо́би на́съ на землѝ неѡсꙋжде́ннѡ взыва́ти къ тебѣ̀:

Ра́дꙋйсѧ, мч҃ника хрⷭ҇то́ва меркꙋ́рїа на по́двигъ ра́тный ᲂу҆крѣпи́вшаѧ: ра́дꙋйсѧ, гла́сомъ ѿ і҆кѡ́ны твоеѧ̀ ст҃ы́ѧ є҆гѡ̀ воѡдꙋшеви́вшаѧ.

Ра́дꙋйсѧ, ꙗ҆́кѡ дв҃да на голїа́ѳа побѣ́дою є҆го̀ ᲂу҆вѣнча́вшаѧ: ра́дꙋйсѧ, гра́да смоле́нска крѣ́пкое защище́нїе.

Ра́дꙋйсѧ, гра́дъ тво́й ѿ разоре́нїѧ и҆зба́вившаѧ: ра́дꙋйсѧ, и҆зба́вительнице ѿ плѣ́на и҆ пораже́нїѧ.

Ра́дꙋйсѧ, страны̀ рѡссі́йскїѧ блгⷣтное ᲂу҆тѣше́нїе: ра́дꙋйсѧ, цр҃кви хрⷭ҇то́вой бг҃олѣ́пное ᲂу҆краше́нїе.

Ра́дꙋйсѧ, лю́бѧщихъ тѧ̀ при́сное ра́дованїе: ра́дꙋйсѧ, ᲂу҆толи́тельнице печа́лей.

Ра́дꙋйсѧ, болѧ́щихъ и҆сцѣле́нїе: ра́дꙋйсѧ, ᲂу҆ныва́ющихъ въ ско́рбѣхъ ѡ҆бодре́нїе.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ ѕ҃.

Проповѣ́дꙋетъ страна̀ рѡссі́йскаѧ млⷭ҇ти и҆ чꙋдеса̀ твоѧ̀, пречⷭ҇таѧ дв҃о бцⷣе, и҆ гра́дъ смоле́нскъ свѣ́тлѡ красꙋ́етсѧ, и҆мѣ́ѧ чꙋдотво́рнꙋю і҆кѡ́нꙋ твою̀, всѧ̑кїѧ болѣ̑зни и҆сцѣлѧ́ющꙋю и҆ недꙋ́жнымъ здра́вїе подаю́щꙋю. Сегѡ̀ ра́ди со бл҃гоговѣ́нїемъ почита́емъ многоцѣле́бный ѻ҆́бразъ тво́й, гпⷭ҇жѐ всебл҃га́ѧ, и҆ поклонѧ́ющесѧ є҆мꙋ̀, ꙗ҆́кѡ зало́гꙋ твоегѡ̀ къ на́мъ бл҃говоле́нїѧ, вопїе́мъ бг҃ꙋ: А҆ллилꙋ́їа.

І҆́косъ ѕ҃.

Возсїѧ́ла є҆сѝ въ странѣ̀ рѡссі́йстѣй лꙋча́ми бжⷭ҇твенныхъ чꙋде́съ ѿ ст҃ы́ѧ і҆кѡ́ны твоеѧ̀ и҆сходѧ́щими, пречⷭ҇таѧ влⷣчце, къ не́йже ѿ лѣ́тъ дре́внихъ ѻ҆тцы̀ на́ши прихожда́ше въ ско́рбѣхъ и҆ болѣ́знехъ и҆ нетще́тны ѿхожда́ше. И҆́мже вслѣ́дъ и҆ мы̀ къ тебѣ̀ приходѧ́ще и҆ съ любо́вїю бл҃гоговѣ́йнѡ лобыза́ѧ ѻ҆́бразъ тво́й чꙋдотво́рный, мо́лимсѧ тебѣ̀: ᲂу҆толѝ печа̑ли на́ша, ᲂу҆врачꙋ́й недꙋ̑ги на́ша, да зове́мъ тѝ:

Ра́дꙋйсѧ, же́зле ста́рости: ра́дꙋйсѧ, вдови́цъ застꙋпле́нїе.

Ра́дꙋйсѧ, сирѡ́тъ призрѣ́нїе: ра́дꙋйсѧ, младе́нцєвъ воспита́нїе.

Ра́дꙋйсѧ, ни́щихъ снабдѣ́нїе: ра́дꙋйсѧ, плѣ́нныхъ свобожде́нїе.

Ра́дꙋйсѧ, скорбѧ́щихъ ᲂу҆тѣше́нїе: ра́дꙋйсѧ, сто́лпе и҆ ᲂу҆твержде́нїе дѣ́вства.

Ра́дꙋйсѧ, и҆́нокѡвъ покрови́тельнице: ра́дꙋйсѧ, и҆́нокинь наста́внице.

Ра́дꙋйсѧ, по́стникѡвъ ᲂу҆крѣпле́нїе. Ра́дꙋйсѧ, въ по́двигѣ дѣ́вства подвиза́ющихсѧ вспоможе́нїе.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ з҃.

Хотѧ̀ дарова́ти гра́дꙋ москвѣ̀ прича́стїе блгⷣти ѿ ст҃ы́ѧ і҆кѡ́ны твоеѧ̀, влⷣчце всемлⷭ҇тиваѧ, бл҃говоли́ла є҆сѝ принестѝ і҆кѡ́нꙋ твою̀ ѿ смоле́нска въ москвꙋ̀, да та́мѡ пребыва́ѧ, чꙋдесы̑ мно́гими просла́витсѧ. Є҆гда́ же по ᲂу҆моле́нїю жи́телей смоле́нска, возвраща́шесѧ ѻ҆́бразъ тво́й ст҃ы́й въ гра́дъ и҆̀хъ, на мѣ́стѣ прохожде́нїѧ і҆кѡ́ны твоеѧ̀ ѻ҆дїги́трїи ѻ҆би́тель дѣ́въ во и҆́мѧ твоѐ соѡрꙋже́на бы́сть: въ не́йже под̾ ѡ҆сѣне́нїемъ чꙋдотво́рныѧ і҆кѡ́ны твоеѧ̀ съ вѣ́рою и҆ любо́вїю воспѣва́емъ немо́лчнꙋю пѣ́снь бг҃ꙋ: А҆ллилꙋ́їа.

І҆́косъ з҃.

Новосозда́ннаѧ ѻ҆би́тель и҆́нокинь во гра́дѣ москвѣ̀ бл҃гоговѣ́йнѡ чествꙋ́етъ ст҃о́е подо́бїе чꙋдотво́рныѧ і҆кѡ́ны твоеѧ̀ ѻ҆дїги́трїи, млⷭ҇ти неизрече́нныѧ и҆сточа́ющей вѣ́рнымъ, є҆ѧ́же ѡ҆сѣне́нїемъ лю́ди правосла́вныѧ блгⷣтнѡ ᲂу҆тѣша́еши и҆ въ по́двигахъ поста̀ и҆ мл҃твы ᲂу҆твержда́еши, подвиза́ѧ и҆̀хъ немо́лчнѡ воспѣва́ти мт҃рнїѧ твоѧ̑ щедрѡ́ты и҆ бл҃года́рнѡ взыва́ти тебѣ̀:

Ра́дꙋйсѧ, бг҃омъ возлю́бленнаѧ цр҃и́це: ра́дꙋйсѧ, бг҃а возлюби́вшаѧ па́че всегѡ̀ влⷣчце.

Ра́дꙋйсѧ, є҆ди́на бл҃гослове́ннаѧ въ жена́хъ: ра́дꙋйсѧ, нбⷭ҇ныхъ ра́дованїе.

Ра́дꙋйсѧ, земны́хъ застꙋпле́нїе: ра́дꙋйсѧ, де́монѡвъ посрамле́нїе.

Ра́дꙋйсѧ, а҆́да попра́нїе: ра́дꙋйсѧ, ᲂу҆крѣпле́ннаѧ си́лою гдⷭ҇а си́лъ.

Ра́дꙋйсѧ, ѡ҆блече́ннаѧ вла́стїю цр҃и́цы нб҃а и҆ землѝ: ра́дꙋйсѧ, во́инствꙋющихъ на пло́ть цѣломꙋ́дрїемъ бл҃га́ѧ помо́щнице.

Ра́дꙋйсѧ, подвиза́ющихсѧ въ постѣ̀ и҆ безмо́лвїи млⷭ҇тиваѧ ᲂу҆тѣ́шительнице: ра́дꙋйсѧ, и҆збавлѧ́ющаѧ скорбе́й всѧ́ческихъ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ и҃.

Стра́нствїе земно́е многоско́рбное и҆ многомѧте́жное ᲂу҆слажда́еши на́мъ мт҃рнимъ твои́мъ ѡ҆ на́съ попече́нїемъ, бцⷣе, и҆ во днѝ ско́рбныхъ ѡ҆бстоѧ́нїй по́мощь ст҃ꙋ́ю ꙗ҆влѧ́еши на́мъ во сп҃се́нїе. Па́мѧтꙋемъ и҆ и҆сповѣ́дꙋемъ, влⷣчце, твоѐ застꙋпле́нїе, є҆гда̀ га́ллы странꙋ̀ рѡссі́йскꙋю разори́ша и҆ гра́дъ москвꙋ̀ плѣни́ша, ты̀ і҆кѡ́нꙋ свою̀ ст҃ꙋ́ю ѻ҆дїги́трїю ѿ смоле́нска въ полцы̀ во́инства рѡссі́йскагѡ бл҃говоли́ла є҆сѝ принестѝ и҆ тѣ́мъ во́и правосла́вныѧ воѡдꙋшеви́ла є҆сѝ, сла́внꙋю побѣ́дꙋ и҆́мъ дарова́ла є҆сѝ, предста́тельствомъ твои́мъ къ сн҃ꙋ твоемꙋ̀ и҆ бг҃ꙋ. Є҆мꙋ́же пое́мъ: А҆ллилꙋ́їа.

І҆́косъ и҃.

Всѧ̀ млⷭ҇ти и҆ щедрѡ́тъ преиспо́лненнаѧ, всебл҃га́ѧ мт҃и бж҃їѧ, во́инствꙋ правосла́вномꙋ по́мощь и҆ ѡ҆долѣ́нїе на врагѝ пресла́внѡ дарова́ла є҆сѝ. И҆ є҆гда̀ не бѣ̀ на́мъ ᲂу҆жѐ сп҃се́нїѧ наде́жды, ꙗ҆́кѡ и҆ на́шъ гра́дъ плѣне́нъ и҆ разоре́нъ бы́сть, га́ллы съ безче́стїемъ ѿ ѻ҆те́чества на́шегѡ ѿгна́ла є҆сѝ и҆ побѣ́дою ди́вною на́съ ᲂу҆вѣнча́ла є҆сѝ. Всегда̀ па́мѧтꙋѧ таково́е твоѐ застꙋпле́нїе, хвале́бнѡ тебѣ̀ вопїе́мъ:

Ра́дꙋйсѧ, странꙋ̀ на́шꙋ рѡссі́йскꙋю ѿ наше́ствїѧ и҆ноплеме́нныхъ преди́внѡ и҆зба́вившаѧ: ра́дꙋйсѧ, го́рдыхъ си́лою свое́ю со стыдо́мъ вспѧ́ть возврати́вшаѧ.

Ра́дꙋйсѧ, и҆новѣ́рныхъ ра́тей всеси́льнаѧ побѣди́тельнице: ра́дꙋйсѧ, правосла́внагѡ во́инства держа́внаѧ посо́бнице.

Ра́дꙋйсѧ, і҆кѡ́ною твое́ю ст҃о́ю съ во́инами рѡссі́йскими млⷭ҇тивнѡ пребыва́ющаѧ: ра́дꙋйсѧ, чꙋдотво́рнымъ ѻ҆́бразомъ твои́мъ полкѝ и҆̀хъ ѡ҆сщ҃а́ющаѧ.

Ра́дꙋйсѧ, и҆знемога́ющихъ си́лою свы́ше ᲂу҆крѣплѧ́ющаѧ: ра́дꙋйсѧ, безпомѡ́щнымъ по́мощь твою̀ ст҃ꙋ́ю подаю́щаѧ.

Ра́дꙋйсѧ, ѻ҆би́димыхъ правосꙋ́днаѧ застꙋ́пнице: ра́дꙋйсѧ, ненаде́жныхъ наде́ждо.

Ра́дꙋйсѧ, печа́льныхъ ѿра́до.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ ѳ҃.

Всѝ вѣ́рнїи съ ра́достїю и҆ ᲂу҆тѣше́нїемъ ви́дѧтъ ѻ҆́бразъ тво́й ст҃ы́й, на не́мже ᲂу҆миле́ннѡ взира́еши на бг҃омладе́нца хрⷭ҇та̀, сегѡ̀ ра́ди мо́лимъ тѧ̀, всебл҃га́ѧ, ꙗ҆́кѡ мт҃рь всѧ̑ содержа́щагѡ въ десни́цѣ свое́й влⷣки: воззрѝ и҆ на на́съ млⷭ҇тивнѡ, и҆ ᲂу҆молѝ гдⷭ҇а, да поми́лꙋетъ на́съ недосто́йныхъ. Наꙋчѝ на́съ, влⷣчце, моли́тисѧ є҆мꙋ̀ бл҃гопрїѧ́тнѡ, и҆ неѡсꙋжде́ннѡ пѣ́ти є҆мꙋ̀ нескве́рными ᲂу҆сты̑ и҆ чи́стымъ се́рдцемъ а҆́гг҃льскꙋю пѣ́снь: А҆ллилꙋ́їа.

І҆́косъ ѳ҃.

Вѣті́йство на́ше пѣ́сненное не довлѣ́етъ къ прославле́нїю мно́гихъ твои́хъ чꙋде́съ, бцⷣе ѻ҆дїги́трїе, и҆̀хже ѿ ст҃ы́ѧ і҆кѡ́ны твоеѧ̀ ꙗ҆ви́ла є҆сѝ и҆ при́снѡ ꙗ҆влѧ́еши вѣ́рнымъ: ѻ҆ба́че ты̀, ꙗ҆́кѡ вои́стиннꙋ бл҃га́ѧ мт҃и, вѣ́рꙋ и҆ ᲂу҆се́рдїе на́ше прїимѝ: вѣ́си бо и҆ любо́вь къ тебѣ̀ на́шꙋ, є҆́юже сердца̀ на́ша пламенѣ́ютъ, и҆ млⷭ҇тивнѡ ᲂу҆слы́ши сїѝ въ простотѣ̀ соста́влєнныѧ похвалы̀:

Ра́дꙋйсѧ, ѡ҆бра́дованнаѧ приснодв҃о: ра́дꙋйсѧ, невѣ́сто неневѣ́стнаѧ.

Ра́дꙋйсѧ, селе́нїе бг҃а сло́ва: ра́дꙋйсѧ, ѻ҆би́тель ст҃ѣ́йшагѡ ст҃ы́хъ.

Ра́дꙋйсѧ, съ сн҃омъ цр҃е́мъ нб҃съ вѣ́чнѡ ца́рствꙋющаѧ: ра́дꙋйсѧ, мт҃рнее дерзнове́нїе къ немꙋ̀ и҆мꙋ́щаѧ.

Ра́дꙋйсѧ, моли́твамъ вѣ́рныхъ ми́лостивнѡ вне́млющаѧ: ра́дꙋйсѧ, лю́бѧщимъ тѧ̀ любо́вїю твое́ю бжⷭ҇твенною воздаю́щаѧ.

Ра́дꙋйсѧ, сїѡ́на го́рнѧгѡ ᲂу҆краше́нїе: ра́дꙋйсѧ, мі́ра до́льнѧгѡ защище́нїе.

Ра́дꙋйсѧ, гра́дѣ сп҃се́нїѧ на́шегѡ: ра́дꙋйсѧ, горо̀ ст҃а́ѧ, соше́ствїемъ бж҃їимъ просла́вленнаѧ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ і҃.

Сп҃сѝ на́съ, влⷣчце, ѿ поги́бели вѣ́чныѧ мт҃рнимъ предста́тельствомъ твои́мъ ко хрⷭ҇тꙋ̀ бг҃ꙋ, и҆ сподо́би на́съ ᲂу҆зрѣ́ти тѧ̀ въ ча́съ кончи́ны на́шеѧ, ѿ рꙋкѝ лю́тагѡ мїродержи́телѧ дꙋ́шꙋ на́шꙋ соблюда́ющꙋю: да по́мощїю твое́ю ст҃о́ю и҆збѣ́гнемъ є҆гѡ̀ сѣте́й и҆ сподо́бимсѧ црⷭ҇твїе нбⷭ҇ное полꙋчи́ти и҆ въ ра́дости вѣ́чнѣй воспѣва́ти чл҃вѣколю́бцꙋ бг҃ꙋ: А҆ллилꙋ́їа.

І҆́косъ і҃.

Стѣна̀ є҆сѝ дѣ́вамъ, бцⷣе дв҃о, и҆ всѣ́мъ ревни́телємъ дѣ́вства и҆ чистоты̀ ᲂу҆се́рднаѧ помо́щнице. Мо́лимъ тѧ̀, пречⷭ҇таѧ, ѡ҆чи́сти на́ша сердца̀ ѿ всѧ̑кїѧ скве́рны грѣхо́вныѧ, и҆ ᲂу҆красѝ дꙋ́ши на́ша цѣломꙋ́дрїемъ и҆ чистото́ю, да невреди́мы пребꙋ́демъ ѿ всѣ́хъ и҆скꙋше́нїй мі́ра, пло́ти и҆ дїа́вола находѧ́щихъ, и҆ сподо́бимсѧ досто́йнѡ возглаша́ти тебѣ̀ пѣ̑сни такова̑ѧ:

Ра́дꙋйсѧ, до́браѧ младопита́тельнице дѣ́вамъ: ра́дꙋйсѧ, бл҃госе́рдаѧ попечи́тельнице сирѡ́тъ.

Ра́дꙋйсѧ, ти́хое прибѣ́жище ѡ҆бꙋрева́емыхъ страстѧ́ми: ра́дꙋйсѧ, наде́жное приста́нище смꙋща́емыхъ и҆скꙋше́нїѧми.

Ра́дꙋйсѧ, мздовоздаѧ́тельнице подви́жникѡвъ цѣломꙋ́дрїѧ: ра́дꙋйсѧ, спобо́рнице борю́щихсѧ со враги̑ неви́димыми.

Ра́дꙋйсѧ, млⷭ҇тиваѧ посѣти́тельнице непови́ннѡ ѡ҆сꙋжде́нныхъ: ра́дꙋйсѧ, бл҃га́ѧ ᲂу҆тѣ́шительнице напра́снѡ ѡ҆клевета́нныхъ.

Ра́дꙋйсѧ, бжⷭ҇твеннаѧ свободи́тельнице сꙋ́щихъ въ плѣнꙋ̀ и҆ и҆згна́нїи: ра́дꙋйсѧ, всемо́щнаѧ покрови́тельнице трꙋжда́ющихсѧ и҆ ѡ҆бремене́нныхъ.

Ра́дꙋйсѧ, сꙋдїѝ пра́веднагѡ ᲂу҆моле́нїе: ра́дꙋйсѧ, грѣ́шныхъ съ бг҃омъ примире́нїе.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ а҃і.

Пѣ́нїе всеꙋмиле́нное слы́шаще ѿ вѣ́рныхъ рабѡ́въ твои́хъ возноси́мое ты̀, пречⷭ҇таѧ мт҃и дв҃о, ꙗ҆́кѡ и҆мꙋ́щаѧ млⷭ҇рдїе неизрече́нное, насы́ти на́съ пи́щею нетлѣ́нною сло́ва бж҃їѧ и҆ наꙋчѝ на́съ всегда̀ и҆сполнѧ́ти животвѡ́рныѧ за́пѡвѣди гдⷭ҇а на́шегѡ: є҆го́же ᲂу҆молѝ, предста́тельнице на́ша всебл҃га́ѧ, да низпо́слетъ млⷭ҇ть свою̀ на́мъ недосто́йнымъ и҆ сподо́битъ на́съ ᲂу҆наслѣ́довати є҆гѡ̀ всесвѣ́тлое и҆ всебл҃же́нное црⷭ҇твїе, и҆дѣ́же ѿ всѣ́хъ ст҃ы́хъ пое́тсѧ є҆мꙋ̀ хвале́бнаѧ пѣ́снь: А҆ллилꙋ́їа.

І҆́косъ а҃і.

Свѣ́тлыми лꙋча́ми чꙋде́съ твои́хъ, бцⷣе дв҃о, просвѣща́еши на́съ блгⷣтнѡ, и҆ ѿ ст҃ы́ѧ і҆кѡ́ны твоеѧ̀ ѻ҆дїги́трїи ᲂу҆тѣше́нїе дх҃о́вное низпосыла́еши ᲂу҆го́дникѡмъ бж҃їимъ. На́мъ же, грѣ́шнымъ, да́ры цѣлє́бныѧ подае́ши ѿ неѧ̀ неѡскꙋ́днѡ, да зове́мъ тѝ бл҃года́рственнѡ и҆ хвале́бнѡ:

Ра́дꙋйсѧ, а҆́гнца и҆ па́стырѧ нетлѣ́ннаго ро́ждшаѧ: ра́дꙋйсѧ, дѣ́вство и҆ рождество̀ въ себѣ̀ сочета́вшаѧ.

Ра́дꙋйсѧ, крі́не дѣ́вства, къ чи́стомꙋ и҆ дѣ́вственномꙋ житїю̀ приводѧ́щаѧ: ра́дꙋйсѧ, и҆збра́нникѡмъ бж҃їимъ любо́вь твою̀ ст҃ꙋ́ю ꙗ҆влѧ́ющаѧ.

Ра́дꙋйсѧ, ᲂу҆го́дникѡмъ гдⷭ҇нимъ велѣ̑нїѧ нбⷭ҇ныѧ ѿкрыва́ющаѧ: ра́дꙋйсѧ, прпⷣбнагѡ се́ргїа ра́донежскагѡ посѣще́нїемъ твои́мъ сподо́бившаѧ.

Ра́дꙋйсѧ, прпⷣбнагѡ кѷрі́лла бѣлоезе́рскагѡ гла́сомъ ѿ і҆кѡ́ны твоеѧ̀ на бѣлое́зеро напра́вившаѧ: ра́дꙋйсѧ, прпⷣбнагѡ савва́тїа солове́цкагѡ въ по́двигахъ пꙋсты́нныхъ ᲂу҆крѣпи́вшаѧ.

Ра́дꙋйсѧ, ст҃и́телѧ митрофа́на воро́нежскагѡ і҆кѡ́ною твое́ю ѡ҆блгⷣтствовавшаѧ.

Ра́дꙋйсѧ, ѻ҆би́телей хрⷭ҇то́выхъ покро́въ и҆ снабдѣ́нїе: ра́дꙋйсѧ, рабѡ́въ бж҃їихъ средѝ мі́ра та́йное вразꙋмле́нїе.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ в҃і.

Блгⷣть бж҃їѧ дѣ́йствꙋетъ въ чꙋдесѣ́хъ, пресла́внѡ ꙗ҆влѧ́емыхъ ѿ ст҃а́гѡ ѻ҆́браза твоегѡ̀, пребл҃гослове́ннаѧ бцⷣе дв҃о, є҆́юже и҆ на́ши дꙋ́ши просвѣтѝ, мра́къ грѣхо́вный разгонѧ́ѧ сїѧ́нїемъ со́лнца пра́вды хрⷭ҇та̀, да во свѣ́тѣ повелѣ́нїй є҆гѡ̀ бг҃оꙋго́днѡ житїѐ сїѐ вре́менное поживе́мъ во всѧ́комъ бл҃гоче́стїи и҆ чистотѣ̀ и҆ сподо́бимсѧ бл҃же́нство вѣ́чное полꙋчи́ти и҆ со и҆збра́нными пѣ́ти бг҃ꙋ: А҆ллилꙋ́їа.

І҆́косъ в҃і.

Пою́ще твоѧ̑ чꙋдеса̀, бцⷣе, проповѣ́дꙋемъ млⷭ҇ти твоѧ̑, прославлѧ́емъ щедрѡ́ты твоѧ̑ неисчє́тныѧ и҆, припа́даѧ къ чꙋдотво́рнѣй і҆кѡ́нѣ твое́й, мо́лимтисѧ съ вѣ́рою и҆ любо́вїю: бꙋ́ди на́мъ пꙋтеводи́тельница бл҃га́ѧ къ свѣ́тломꙋ гра́дꙋ і҆ерⷭ҇ли́мꙋ нбⷭ҇номꙋ, да ᲂу҆́зримъ тѧ̀ съ высоты̀ сла́вы твоеѧ̀ бжⷭ҇твенныѧ на на́съ млⷭ҇тивнѡ взира́ющꙋю и҆ вкꙋ́пѣ со ст҃ы́ми воспое́мъ тѝ си́це:

Ра́дꙋйсѧ, ра́досте на́ша прест҃а́ѧ: ра́дꙋйсѧ, цр҃и́це на́ша пребл҃га́ѧ.

Ра́дꙋйсѧ, ᲂу҆сынови́вшаѧ на́съ при крⷭ҇тѣ̀ сн҃а твоегѡ̀ и҆ бг҃а: ра́дꙋйсѧ, мт҃рнюю любо́вь къ на́мъ ꙗ҆влѧ́ющаѧ.

Ра́дꙋйсѧ, во бл҃ги́хъ жела̑нїѧ на̑ша ди́внѡ и҆сполнѧ́ющаѧ: ра́дꙋйсѧ, скоропослꙋ́шливаѧ къ смире́ннымъ мл҃твамъ.

Ра́дꙋйсѧ, покро́вомъ твои́мъ ст҃ы́мъ на́съ покрыва́ющаѧ: ра́дꙋйсѧ, ри́зою твое́ю чтⷭ҇но́ю бл҃гонаде́жнѡ на́съ защища́ющаѧ.

Ра́дꙋйсѧ, въ ча́съ кончи́ны на́шеѧ всеси́льнаѧ на́мъ помо́щнице: ра́дꙋйсѧ, въ мыта́рствахъ воздꙋ́шныхъ держа́внаѧ на́мъ застꙋ́пнице.

Ра́дꙋйсѧ, тѣле́съ на́шихъ безвозме́здное врачева́нїе: ра́дꙋйсѧ, дꙋ́шъ на́шихъ сп҃се́нїе.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ г҃і.

Ѽ всепѣ́таѧ мт҃и, цр҃и́це всемлⷭ҇тиваѧ дв҃о бцⷣе ѻ҆дїги́трїе! Прїимѝ ма́лое сїѐ моле́нїе на́ше и҆ принесѝ є҆̀ сн҃ꙋ твоемꙋ̀ и҆ бг҃ꙋ на́шемꙋ, мт҃рне ᲂу҆молѧ́ѧ є҆гѡ̀ бл҃гость, да поми́лꙋетъ на́съ грѣ́шныхъ и҆ недосто́йныхъ, и҆ твоегѡ̀ ра́ди всеси́льнагѡ хода́тайства и҆зба́витъ на́съ мꙋче́нїѧ вѣ́чнагѡ, сподо́битъ црⷭ҇твїе нбⷭ҇ное полꙋчи́ти и҆ та́мѡ со а҆́гг҃лы воспѣва́ти бг҃ꙋ: А҆ллилꙋ́їа.

Се́й конда́къ чте́тсѧ три́жды. И҆ па́ки і҆́косъ а҃-й и҆ конда́къ а҃-й.

І҆́косъ а҃.

Ра́дꙋйсѧ, бг҃а ѻ҆ц҃а̀ бл҃говоле́нїемъ ѡ҆сѣне́ннаѧ: ра́дꙋйсѧ, бг҃а сн҃а мт҃и неискꙋсобра́чнаѧ.

Ра́дꙋйсѧ, бг҃а дх҃а ст҃а́гѡ ѻ҆би́тель сщ҃е́ннаѧ: ра́дꙋйсѧ, трⷪ҇ческїѧ та́йны проѧвле́нїе.

Ра́дꙋйсѧ, а҆́гг҃льскихъ ᲂу҆мѡ́въ ᲂу҆дивле́нїе: ра́дꙋйсѧ, чл҃вѣ́ческагѡ ро́да ᲂу҆краше́нїе.

Ра́дꙋйсѧ, го́рнѧѧ съ до́льними совокꙋпи́вшаѧ: ра́дꙋйсѧ, врата̀ ра́йскїѧ земнорѡ́днымъ ѿве́рзшаѧ.

Ра́дꙋйсѧ, лѣ́ствице нбⷭ҇наѧ: ра́дꙋйсѧ, ста́мно бг҃опрїи́мнаѧ.

Ра́дꙋйсѧ, кꙋпино̀ неѡпали́маѧ: ра́дꙋйсѧ, трапе́зо прест҃а́ѧ.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Конда́къ а҃.

Ра́дꙋйсѧ, бцⷣе ѻ҆дїги́трїе, хрⷭ҇тїа́нъ ᲂу҆пова́нїе.

Мл҃тва а҃.

Ѽ пречꙋ́днаѧ и҆ превы́шшаѧ всѣ́хъ тва́рей цр҃и́це бцⷣе, нбⷭ҇нагѡ цр҃ѧ̀ хрⷭ҇та̀ бг҃а на́шегѡ мт҃и, прест҃а́ѧ ѻ҆дїги́трїе мр҃і́е! Оу҆слы́ши на́съ грѣ́шныхъ и҆ недосто́йныхъ, въ ча́съ се́й молѧ́щихсѧ и҆ къ тебѣ̀ со воздыха́нїемъ и҆ слеза́ми пред̾ пречⷭ҇тымъ твои́мъ ѻ҆́бразомъ припа́дающихъ и҆ си́це ᲂу҆ми́льнѡ глаго́лющихъ: и҆зведѝ на́съ ѿ ро́ва страсте́й, ѻ҆дїги́трїе бл҃га́ѧ, и҆зба́ви на́съ ѿ всѧ́кїѧ ско́рби и҆ печа́ли, ѡ҆градѝ ѿ всѧ́кїѧ напа́сти и҆ ѕлы́ѧ клеветы̀, и҆ ѿ непра́веднагѡ навѣ́та вра́жїѧ. Мо́жеши бо, ѽ блгⷣтнаѧ мт҃и на́ша, ѿ всѧ́кагѡ ѕла̀ сохрани́ти лю́ди твоѧ̀, и҆ всѧ́кимъ бл҃годѣѧ́нїемъ снабди́ти и҆ сп҃стѝ, ра́звѣ бо тебѐ и҆ны́ѧ предста́тельницы въ бѣда́хъ и҆ ѡ҆бстоѧ́нїихъ и҆ те́плыѧ хода́таицы ѡ҆ на́съ грѣ́шныхъ къ сн҃ꙋ твоемꙋ̀, хрⷭ҇тꙋ̀ бг҃ꙋ на́шемꙋ, не и҆́мамы. Є҆го́же ᲂу҆молѝ, влⷣчце, сп҃стѝ на́съ и҆ црⷭ҇твїѧ нбⷭ҇наго сподо́бити, да сп҃се́ннїи тобо́ю сла́вимъ тѧ̀ и҆ въ бꙋ́дꙋщемъ вѣ́цѣ, ꙗ҆́кѡ же сп҃се́нїѧ на́шегѡ вино́вницꙋ, и҆ превозно́симъ всест҃о́е и҆ великолѣ́пое и҆́мѧ ѻ҆ц҃а̀ и҆ сн҃а и҆ ст҃а́гѡ дх҃а, въ трⷪ҇цѣ сла́вимагѡ и҆ поклонѧ́емагѡ бг҃а во вѣ́ки вѣкѡ́въ. А҆ми́нь.

Мл҃тва в҃.

Къ комꙋ̀ возопїю̀, влⷣчце; Къ комꙋ̀ прибѣ́гнꙋ въ го́рести мое́й, а҆́ще не къ тебѣ̀, гпⷭ҇жѐ влⷣчце бцⷣе, цр҃и́це нбⷭ҇наѧ; Кто̀ пла́чъ мо́й и҆ воздыха́нїе моѐ прїи́метъ, а҆́ще не ты̀, ѽ пренепоро́чнаѧ, наде́ждо хрⷭ҇тїа́нъ и҆ прибѣ́жище грѣ́шнымъ; Приклонѝ, ѽ пречⷭ҇таѧ влⷣчце, ᲂу҆шеса̀ твоѧ̑ къ моле́нїю моемꙋ̀. Мт҃и бг҃а моегѡ̀, не пре́зри мѧ̀, тре́бꙋюща твоеѧ̀ по́мощи, ᲂу҆слы́ши стена́нїе моѐ и҆ во́пль се́рдца моегѡ̀ внꙋшѝ, ѽ гпⷭ҇жѐ бцⷣе цр҃и́це. И҆ пода́ждь мѝ ра́дость дꙋше́внꙋю, подкрѣпѝ мѧ̀ нетерпѣли́ваго, ᲂу҆ны́лаго и҆ неради́ваго къ твоемꙋ̀ хвале́нїю. Вразꙋмѝ и҆ наꙋчѝ мѧ̀, ка́кѡ тебѣ̀ моли́тисѧ подоба́етъ, и҆ не ѿстꙋпѝ ѿ менє̀, мт҃и бг҃а моегѡ̀, за ропта́нїе и҆ нетерпѣ́нїе моѐ, но бꙋ́ди мѝ покро́въ и҆ застꙋпле́нїе въ жи́зни мое́й и҆ приведѝ мѧ̀ къ ти́хомꙋ приста́нищꙋ бл҃же́ннагѡ ѻ҆́нагѡ поко́ѧ, и҆ сопричтѝ мѧ̀ къ ли́кꙋ и҆збра́ннагѡ твоегѡ̀ ста́да и҆ та́мѡ ᲂу҆досто́й мѧ̀ воспѣва́ти и҆ сла́вити тѧ̀ во вѣ́ки. А҆ми́нь.

Икос 5

Видевше преславное заступление Твое града Смоленска, Пречистая Владычице, прославляем великую Твою милость, ею же град сей от разорения Батыева чудесно спасла еси, гласом Божественным от иконы Твоея исшедшим, угодника Христова Меркурия на единоборство с предводителем рати Батыевой послав; его же он мечем своим порази и град Твой от запаления огненнаго избави. Самого же его венцем мученическим увенчала еси, того молитвами небесными сподоби нас на земли неосужденно взывати к Тебе:

Радуйся, мученика Христова Меркурия на подвиг ратный укрепившая; радуйся, гласом от иконы Твоея святыя его воодушевившая.

Радуйся, яко Давида на Голиафа победою его увенчавшая; радуйся, града Смоленска крепкое защищение.

Радуйся, град Твой от разорения избавившая; радуйся, Избавительнице от плена и поражения.

Радуйся, страны Российския благодатное утешение; радуйся, Церкви Христовой Боголепное украшение.

Радуйся, любящих Тя присное радование; радуйся, Утолительнице печалей.

Радуйся, болящих исцеление; радуйся, унывающих в скорбех ободрение.

Радуйся, Богородице Одигитрие, христиан упование.